കൊല്ലം: ബൈക്കില്‍ കറങ്ങി കോളനി പരിസരങ്ങള്‍, കുളിക്കടവുകള്‍ എന്നിവ കേന്ദ്രീകരിച്ച് കഞ്ചാവ് വില്‍പന നടത്തുന്നയാള്‍ പിടിയില്‍. പെരുമ്പുഴ എല്ലുകുഴി കോളനിയില്‍ ഹക്കീമുദ്ദീ(30)നെയാണ് 30 പൊതി കഞ്ചാവുമായി ബൈക്ക് സഹിതം കൊല്ലം എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഐ. നൗഷാദിന്റെ നേതൃത്വത്തില്‍ അറസ്റ്റ് ചെയ്തത്. കോളനികള്‍ക്കു സമീപം കാടുപിടിച്ച് കിടക്കുന്നതും വാഹനം എത്തിപ്പെടാന്‍ സാധ്യതയില്ലാത്തതുമായ പ്രദേശങ്ങളില്‍ കുറ്റിക്കാടുകള്‍ക്കിടയില്‍ കഞ്ചാവ് വലിക്കുവാനുള്ള സൗകര്യമൊരുക്കി അവിടേക്കു യുവാക്കളേയും വിദ്യാര്‍ഥികളെയും ആകര്‍ഷിച്ച് വില്‍പന നടത്തുന്നതാണു ഹക്കീമിന്റെ രീതി.
5,000 രൂപയ്ക്കു കഞ്ചാവ് വാങ്ങി 100 ചെറുപൊതികളാക്കി പൊതി ഒന്നിന് 300 രൂപാ നിരക്കില്‍ വില്‍പന നടത്തുകയാണ് ചെയ്യുന്നതെന്ന് ഹക്കീമുദ്ദീന്‍ പറഞ്ഞു. ഇയാളില്‍ നിന്ന് 2,200 രൂപയും പിടിച്ചെടുത്തു. രഹസ്യവിവരത്തിന്റെ അടിസ്ഥാനത്തിലാണ് എക്‌സൈസ് അന്വേഷണം നടത്തിയത്.
പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. റെയ്ഡില്‍ പ്രിവന്റിവ് ഓഫിസര്‍ ആര്‍. സുരേഷ്ബാബു, സിവില്‍ എക്‌സൈസ് ഓഫിസര്‍മാരായ ബിജുമോന്‍, രഞ്ജിത്, സതീഷ് ചന്ദ്രന്‍, അനില്‍, ഡ്രൈവര്‍ ദിലീപ് എന്നിവരും പങ്കെടുത്തു.