ന്യൂഡല്‍ഹി: ലെഫ്റ്റനന്റ് ഗവര്‍ണര്‍ അനില്‍ ബൈജാലുമായുള്ള 25 മിനിട്ടു നേരത്തെ കൂടിക്കാഴ്ചയ്ക്കു ശേഷം കേന്ദ്രത്തിനെതിരേ രൂക്ഷ വിമര്‍ശനവുമായി ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍.

ചരിത്രത്തിലാദ്യമായാണ് കേന്ദ്ര സര്‍ക്കാര്‍ സുപ്രിം കോടതി വിധി ലംഘിക്കുന്നതെന്നു കെജ്‌രിവാള്‍ പറഞ്ഞു. ലെഫ്റ്റനന്റ് ഗവര്‍ണറുടെ നടപടി രാജ്യത്തെ അരാജകത്വത്തിലേക്ക് നയിക്കും.

ഉദ്യോഗസ്ഥരുടെ നിയമനവും സ്ഥലംമാറ്റവും സംബന്ധിച്ച അധികാരം വിട്ടുതരാന്‍ ലെഫ്റ്റനന്റ് ഗവര്‍ണര്‍ തയാറാകുന്നില്ല. ആഭ്യന്തര മന്ത്രാലയത്തിന്റെ 2015 ലെ ഉത്തരവ് നിലനില്‍ക്കുന്നുണ്ടെന്നാണ് വാദം. ഇത്തരത്തില്‍ എങ്ങിനെയാണ് കേന്ദ്രസര്‍ക്കാറിന്റെ പ്രതിപക്ഷം ഡല്‍ഹിയില്‍ അധികാരത്തിലിരിക്കുമ്പോള്‍ ഭരണം നടത്താനാകുകയെന്നും കെജ്‌രിവാള്‍ ചോദിച്ചു.

അധികാരം കിട്ടിയാല്‍ ചില പ്രധാനപ്പെട്ട തീരുമാനങ്ങള്‍ നമ്മള്‍ കൈക്കൊള്ളും. ലെഫ്റ്റനന്റ് ഗവര്‍ണറുടെ എതിര്‍പ്പ് മറികടന്നാണ് വീട്ടുപടിക്കല്‍ റേഷന്‍ എത്തിക്കാനുള്ള തീരുമാനം തങ്ങള്‍ കൈക്കൊണ്ടത്- കെജ്‌രിവാള്‍ പറഞ്ഞു.

ഡല്‍ഹിക്കായി ഒന്നിച്ചുപ്രവര്‍ത്തിക്കാന്‍ തയാറാണെന്ന് കൂടിക്കാഴ്ചയ്ക്കു ശേഷം കെജ്‌രിവാള്‍ ട്വീറ്റ് ചെയ്തിരുന്നു. ഭരണഘടനയാണ് എല്ലാത്തിനും മുകളില്‍. സുപ്രിം കോടതിയുടെ ഉത്തരവ് രാജ്യത്തിന്റെ നിയമമാണ്. അതിനെ ബഹുമാനിക്കണം- കെജരിവാള്‍ ട്വീറ്റ് ചെയ്തു.