കൊച്ചി:  മദ്യനിരോധന രംഗത്ത് കേരള മദ്യനിരോധന സമിതി ദീര്‍ഘകാലമായി നടത്തിവരുന്ന ഗാന്ധിയന്‍ മാര്‍ഗത്തിലൂടെയുള്ള പോരാട്ടങ്ങള്‍ ദേശീയ ശ്രദ്ധ പിടിച്ചുപറ്റിയിട്ടുണ്ടെന്നും സമിതിയുടെ പ്രവര്‍ത്തനങ്ങള്‍ അനുകരണീയമാണെന്നും ബീഹാര്‍ മുഖ്യമന്ത്രി നിതീഷ് കുമാര്‍. കേരള മദ്യനിരോധന സമിതി സംസ്ഥാന പ്രസിഡന്റ് ഡോ. ജേക്കബ് മണ്ണാറപ്രായില്‍ കോര്‍ എപ്പിസ്‌കോപ്പയുടെ നേതൃത്വത്തില്‍ നിതീഷ് കുമാറിന് നല്‍കിയ സംസ്ഥാനതല സ്വീകരണത്തിന് മറുപടി പറയുകയായിരുന്നു അദ്ദേഹം. മദ്യനിരോധനമെന്ന മഹത്തായ ആശയം നടപ്പിലാക്കുവാനുള്ള സംസ്ഥാനങ്ങളുടെ ഭരണഘടനാപരമായ അധികാരം വിനിയോഗിക്കേണ്ടത് കാലഘട്ടത്തിന്റെ അനിവാര്യതയാണെന്ന് അദ്ദേഹം ചൂണ്ടിക്കാട്ടി.
സമിതിയുടെ നേതൃത്വത്തില്‍ നിതീഷ് കുമാറിന് പൊന്നാടയണിയിക്കുകയും സമിതിയുടെ ഔദ്യോഗിക പ്രസിദ്ധീകരണമായ സത്യാഗ്രഹി മാസികയുടെ പ്രകാശനകര്‍മം അദ്ദേഹം നിര്‍വഹിക്കുകയും ചെയ്തു. സമിതി സംസ്ഥാന വൈസ് പ്രസിഡന്റ് ഫാ. വര്‍ഗീസ് മുഴുത്തേറ്റ്, സെക്രട്ടറി സി.സി സാജന്‍, മദ്യവിരുദ്ധ ജനകീയ മുന്നണി കണ്‍വീനര്‍ കുരുവിള മാത്യൂസ്, ഇടുക്കി ജില്ലാ സെക്രട്ടറി സില്‍ബി ചുനയംമാക്കല്‍, ലീജോ മണ്ണാറപ്രായില്‍ എന്നിവര്‍ പ്രസംഗിച്ചു. ബീഹാറില്‍ നടപ്പിലാക്കിയതുപോലെ അഖിലേന്ത്യാതലത്തില്‍ സമ്പൂര്‍ണ മദ്യനിരോധനം നടപ്പിലാക്കുവാന്‍ ശക്തമായ നേതൃത്വം നല്‍കണമെന്ന് ആവശ്യപ്പെട്ടുകൊണ്ടുള്ള നിവേദനവും സമര്‍പ്പിച്ചു.