മലപ്പുറം: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ എട്ടാമത് ഉറൂസ് മെയ് ആറിനു പാണക്കാട് മഖാമില്‍  നടക്കും. സുന്നി യുവജന സംഘം ജില്ലാ കമ്മിറ്റിയുടെ ആഭിമുഖ്യത്തില്‍ ശിഹാബ് തങ്ങളുടെ വഫാത്ത് ദിനമായ ശഅ്ബാന്‍ ഒന്‍പതിനു വര്‍ഷംതോറും നടത്തിവാരാറുള്ള ഉറൂസാണിത്.
സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ നടക്കുന്ന കൂട്ട സിയാറത്തോടെയാണ് ഉറൂസ് പരിപാടികള്‍ക്കു തുടക്കമാകുക.
അനുസ്മരണം, ഖത്മുല്‍ ഖുര്‍ആന്‍, മൗലിദ് പാരായണം, ദുആ മജ്‌ലിസ് എന്നിവയോടെ നടക്കുന്ന പരിപാടിയില്‍ പ്രമുഖര്‍ സംബന്ധിക്കും. സയ്യിദ് ബി.എസ്.കെ തങ്ങള്‍ ചെയര്‍മാനും ആനമങ്ങാട് മുഹമ്മദ്കുട്ടി ഫൈസി കണ്‍വീനറുമായ സബ് കമ്മിറ്റിയാണ് ഉറൂസിനു നേതൃത്വം നല്‍കുന്നത്. ഉറൂസില്‍വച്ചു മികച്ച മുദര്‍രിസിനുള്ള അവാര്‍ഡ് സമ്മാനിക്കും.
കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി സമാപന പ്രാര്‍ഥനയ്ക്കു നേതൃത്വം നല്‍കും.