കോട്ടയം: കെവിന്‍ വധക്കേസില്‍ വിചാരണ തിയതി പ്രഖ്യാപിക്കുന്നത് ഈ മാസം ആറിലേക്ക് മാറ്റി. കോട്ടയം പ്രിന്‍സിപ്പല്‍ സെഷന്‍സ് കോടതിയാണ് നിലവില്‍ കേസ് പരിഗണിക്കുന്നത്. ഇന്നലെ കേസ് പരിഗണിച്ചപ്പോള്‍ കുറ്റപത്രത്തില്‍ ഗൂഢാലോചനയിലും തട്ടിക്കൊണ്ടു പോകലിലും പങ്കെടുത്ത പ്രതികളുടെ പേരുകള്‍ തെറ്റായാണ് രേഖപ്പെടുത്തിയതെന്ന് പ്രതിഭാഗം ചൂണ്ടിക്കാട്ടി. ഇക്കാര്യം പരിശോധിച്ച് പിശകുണ്ടെങ്കില്‍ തിരുത്തിയ കുറ്റപത്രം ആറിന് കേസ് വീണ്ടും പരിഗണിക്കുമ്പോള്‍ പ്രതികളെ വായിച്ച് കേള്‍പ്പിക്കും.
അസാധാരണ കേസുകളില്‍ ഇത്തരം പിഴവുകള്‍ കടന്നുകൂടാറുണ്ടെന്നും അത്തരം സാഹചര്യങ്ങളില്‍ കുറ്റപത്രത്തില്‍ തിരുത്തലുകള്‍ വരുത്താന്‍ പ്രിന്‍സിപ്പല്‍ കോടതിക്ക് അധികാരമുണ്ടെന്നും പ്രോസിക്യൂഷന്‍ അറിയിച്ചു. കേസില്‍ കസ്റ്റഡിയിലെടുത്ത വാഗണ്‍ ആര്‍ കാര്‍ വിട്ടുനല്‍കണമെന്ന പ്രതിഭാഗത്തിന്റെ അപേക്ഷ കോടതി തള്ളി.