കോഴിക്കോട്: കടലില്‍ കുളിക്കുന്നതിനിടെ തിരയില്‍പെട്ട മകനെയും കൂട്ടുകാരെയും രക്ഷിക്കുന്നതിനിടയില്‍ പിതാവ് മുങ്ങിമരിച്ചു. വെള്ളയില്‍ കണ്ണകടവത്ത് പരേതനായ ഗോപാലന്റെ മകന്‍ പ്രതാപ്(47) ആണ് മരിച്ചത്. ചൊവ്വാഴ്ച ഉച്ചയ്ക്ക് 12 ഓടെ കോഴിക്കോട് ബീച്ചിലെ ലയണ്‍സ് പാര്‍ക്കിന്റെ പിറകിലാണ് സംഭവം.
ഖത്തറിലായിരുന്ന പ്രതാപ് ഒരു മാസം മുന്‍പാണ് ലീവില്‍ വന്നത്. മകനും മകന്റെ കൂട്ടുകാരുമായി കടലില്‍ കുളിക്കാനിറങ്ങിയതായിരുന്നു പ്രതാപ്. ഇതിനിടയിലാണ് മകന്‍ വിഘ്‌നേഷ് (14), കൂട്ടുകാരായ ശബരിനാഥ് (14),രാഹുല്‍ (13) എന്നിവര്‍ തിരയില്‍പ്പെട്ടത്. വാട്ടര്‍ സ്‌കൂട്ടറുമായി രക്ഷാപ്രവര്‍ത്തനം നടത്തിയാണ് പൊലിസ് പ്രതാപിനെ കരയ്‌ക്കെത്തിച്ചത്.
ഉടന്‍ തന്നെ ബീച്ച് ഹോസ്പിറ്റലില്‍ എത്തിച്ചെങ്കിലും രക്ഷിക്കാനായില്ല. മാതാവ്: ശോഭന. ഭാര്യ: ശ്രീജ. മകള്‍: ശ്രീലക്ഷ്മി