മലപ്പുറം: മൊറോക്കോയുടെ തലസ്ഥാനമായ റബാതില്‍ വെച്ച് നടക്കുന്ന ഇസെസ്‌കോ (കഹെമാശര ഋറൗരമശേീിമഹ ടരശലിശേളശര മിറ ഈഹൗേൃമഹ ഛൃഴമിശ്വമശേീി) അന്താരാഷ്ട്ര കോണ്‍ഫറന്‍സില്‍ സി.ഐ.സി കോ ഓഡിനേറ്റര്‍ പ്രൊഫ. അബ്ദുല്‍ ഹക്കീം ഫൈസി ആദൃശ്ശേരി പങ്കെടുക്കും. അറബി സംസാര ഭാഷയല്ലാത്ത രാജ്യങ്ങളില്‍ അറബി ഭാഷയുടെ വ്യാപനം, സ്വാധീനം എന്ന വിഷയത്തെ അധികരിച്ചാണ് ഏപ്രില്‍ അഞ്ച് , ആറ് തിയതികളിലായി കോണ്‍ഫറന്‍സ് നടക്കുന്നത്.
ലോകത്തിന്റെ വിവിധ ഭാഗങ്ങളില്‍ നിന്നുള്ള അറബി ഭാഷാ പണ്ഡിതന്മാര്‍ കോണ്‍ഫറന്‍സില്‍ പങ്കെടുക്കും. കോ ഓഡിനേഷന്‍ ഓഫ് ഇസ്‌ലാമിക് കോളജസ് (സി.ഐ.സി) കോ ഓഡിനേറ്ററായ അബ്ദുല്‍ ഹക്കീം ഫൈസി നിലവില്‍ ഈജിപ്തിലെ കെയ്‌റോ ആസ്ഥാനമായി പ്രവര്‍ത്തിക്കുന്ന ഇസ്‌ലാമിക് യൂനിവേഴ്‌സിറ്റീസ് ലീഗിന്റെ എക്‌സിക്യൂട്ടീവ് അംഗവും യു.എ.ഇ സഹിഷ്ണുത മന്ത്രാലയത്തിനു കീഴിലുള്ള വേള്‍ഡ് മുസ്‌ലിം മൈനോറിറ്റി കൗണ്‍സില്‍ അംഗവുമാണ്.
മൊറോക്കോ ഗവണ്‍മെന്റിന് കീഴില്‍ പ്രവര്‍ത്തിക്കുന്ന ഇസെസ്‌കോ ആണ് ആഗോള തലത്തില്‍ അറബി ഭാഷാപഠന സ്ഥാപനങ്ങളുടെ കൂട്ടായ്മ രൂപീകരിച്ചിരിക്കുന്നത്. ഇന്റര്‍നാഷനല്‍ അസോസിയേഷന്‍ ഓഫ് ഇന്‍സ്റ്റിറ്റിയൂഷന്‍സ് ഓഫ് ടീച്ചിങ് അറബിക് ലാംഗ്വേജ് ഫോര്‍ നോണ്‍ അറബിക് സ്പീക്കേഴ്‌സ് എന്ന ഈ സംഘടനയുടെ സ്ഥാപകാംഗമായ ഹക്കീം ഫൈസി പ്രഥമ പ്രവര്‍ത്തക സമിതിയിലും ജനറല്‍ ബോഡി യോഗത്തിലും പങ്കെടുക്കും.