തിരുവനന്തപുരം: കൊവിഡിന്റെ മറവില്‍ സംസ്ഥാനത്ത് 44 ബിയര്‍- വൈന്‍ പാര്‍ലറുകള്‍ക്ക് അനുമതി നല്‍കാനുള്ള നടപടികള്‍ സര്‍ക്കാര്‍ ആരംഭിച്ചു.
ബിയര്‍ -വൈന്‍ പാര്‍ലറുകള്‍ ആരംഭിക്കുന്നതിന് 44 ടൂറിസം കേന്ദ്രങ്ങള്‍ കണ്ടെത്തിക്കൊടുക്കുന്നതിന് ടൂറിസം ഡയരക്ടറോട് ടൂറിസം സെക്രട്ടറി ആവശ്യപ്പെട്ടിട്ടുണ്ട്.
കഴിഞ്ഞ 22ന് ഇക്കാര്യം ആവശ്യപ്പെട്ട് ടൂറിസം സെക്രട്ടറി, ടൂറിസം ഡയരക്ടര്‍ക്ക് കത്തയച്ചിട്ടുണ്ട്.
എക്‌സൈസ് വകുപ്പിന്റെ ഉത്തരവ് പ്രകാരം നികുതി വകുപ്പാണ് സംസ്ഥാനത്തെ പ്രധാനപ്പെട്ട 44 ടൂറിസം കേന്ദ്രങ്ങള്‍ ഏതെല്ലാമാണെന്ന് കണ്ടെത്തി നല്‍കണമെന്ന് ടൂറിസം വകുപ്പിനോട് ആവശ്യപ്പെട്ടിരിക്കുന്നത്.
എത്രയും പെട്ടെന്ന് ഇതിനുള്ള നടപടികള്‍ സ്വീകരിക്കണമെന്നും കത്തില്‍ ആവശ്യപ്പെട്ടിട്ടുണ്ട്.
മദ്യ വര്‍ജനമാണ് നയമെന്ന് പറയുമ്പോഴും സംസ്ഥാനത്ത് വന്‍തോതില്‍ മദ്യശാലകള്‍ തുറക്കുന്നതിനുള്ള ശ്രമമാണ് സര്‍ക്കാര്‍ ഈ നീക്കത്തിലൂടെ നടത്തുന്നത്.