തിരുവനന്തപുരം: ലോക്‌സഭാ തെരഞ്ഞെടുപ്പിന്റെ ഭാഗമായുള്ള പ്രവര്‍ത്തനങ്ങള്‍ ഏകോപിപ്പിക്കുന്നതിനായി ലോക്‌സഭാ മണ്ഡലാടിസ്ഥാനത്തില്‍ ചാര്‍ജ് ഓഫിസര്‍മാരെ നിയമിച്ചതായി ജില്ലാ തെരഞ്ഞെടുപ്പ് ഓഫിസര്‍ ഡോ. കെ. വാസുകി അറിയിച്ചു.
തിരുവനന്തപുരം ലോക്‌സഭാ മണ്ഡലത്തില്‍ അസിസ്റ്റന്റ് കലക്ടര്‍ ജി. പ്രിയങ്കയും ആറ്റിങ്ങല്‍ മണ്ഡലത്തില്‍ നെടുമങ്ങാട് ആര്‍.ഡി.ഒ ടി.കെ വിനീതുമായിരിക്കും ചാര്‍ജ് ഓഫിസര്‍മാര്‍. നിയമസഭാ മണ്ഡലാടിസ്ഥാനത്തില്‍ ജീവനക്കാര്‍ക്കായി നടക്കുന്ന പരിശീലനത്തിന്റെ മേല്‍നോട്ടവും ഏകോപനവും, അസിസ്റ്റന്റ് റിട്ടേണിങ് ഓഫിസര്‍മാര്‍, ഇലക്ടറല്‍ രജിസ്‌ട്രേഷന്‍ ഓഫിസര്‍മാര്‍ എന്നിവര്‍ തമ്മിലുള്ള ഏകോപനം, പോളിങ് സാമഗ്രികളുടെ വിതരണ മേല്‍നോട്ടം, ഇലക്ട്രോണിക് വോട്ടിങ് യന്ത്രങ്ങള്‍ വിതരണ കേന്ദ്രങ്ങളിലേക്ക് എത്തിക്കുന്നതിന്റെ മേല്‍നോട്ടം, ബൂത്ത് ക്രമീകരണത്തിന്റെ മേല്‍നോട്ടം തുടങ്ങിയവയ്ക്കായാണ് ചാര്‍ജ് ഓഫിസര്‍മാരെ നിയമിച്ചത്.