ജിദ്ദ: സഊദിയില്‍ ചായ വാങ്ങാന്‍ മാസ്‌ക് ധരിക്കാതെ പുറത്തിറങ്ങിയ മലയാളിക്ക് 2,500 റിയാല്‍ പിഴ. കൂടാതെ എട്ടു മണിക്കൂര്‍ പൊലിസ് കസ്റ്റഡിയിലും കഴിയേണ്ടി വന്നു. ജോലി ആവശ്യാര്‍ഥം ദമാമില്‍ നിന്ന് റിയാദിലെത്തിയതായിരുന്നു ഇയാള്‍. സ്വയം കാറോടിച്ച് വന്നതിനാല്‍ ക്ഷീണം മാറ്റാനായി വാഹനം റോഡരികില്‍ നിര്‍ത്തി അടുത്തുള്ള ബൂഫിയയില്‍ ചായ വാങ്ങാനായി പോയി.
എന്നാല്‍ ധരിച്ചിരുന്ന മാസ്‌ക് കാറില്‍ അഴിച്ചുവച്ചായിരുന്നു ഇയാള്‍ ബൂഫിയയില്‍ എത്തിയത്. യാദൃശ്ചികമായി ആ സമയം അവിടെ എത്തിയ പൊലിസ് ഇദ്ദേഹത്തെ മാസ്‌ക് ധരിക്കാത്തതിന്റെ പേരില്‍ പിടികൂടി. പൊലിസ് സ്‌റ്റേഷനില്‍ എത്തിച്ച മലയാളിയെ മെഡിക്കല്‍ പരിശോധന നടത്തുകയും എട്ടു മണിക്കൂര്‍ കസ്റ്റഡിയില്‍ വെക്കുകയും ചെയ്തു.
ഈ സമയം പ്രതിരോധ മാര്‍ഗങ്ങള്‍ സ്വീകരിക്കേണ്ടതിന്റെ പ്രാധാന്യം ബോധ്യപ്പെടുത്തുന്ന ഉപദേശങ്ങളും ഇദ്ദേഹത്തിനു പോലിസുകാര്‍ നല്‍കി. തുടര്‍ന്ന് മാസ്‌ക് ധരിക്കാത്തതിനു 1,000 റിയാലും അദ്ദേഹത്തിന്റെ കാര്‍ പൊലിസ് സ്‌റ്റേഷനില്‍ എത്തിക്കേണ്ടി വന്നതിനു 1,500 റിയാലും ചേര്‍ത്ത് പിഴ ചുമത്തുകയായിരുന്നു.