വിനയന്‍ പിലിക്കോട്

ചെറുവത്തൂര്‍: അധ്യാപകരുടെ അവധിക്കാല പരിശീലനം അടിമുടി മാറുന്നു. പരിശീലനത്തിനു പകരം ശില്‍പശാലകളാണ് ഇത്തവണ നടക്കുക. നാലുദിവസം അക്കാദമിക ശില്‍പശാലകള്‍ നടക്കുമ്പോള്‍ നാലുദിവസം ഐ.ടി സാധ്യതകള്‍ പരിചയപ്പെടും.  സ്റ്റേറ്റ് റിസോഴ്‌സ് ഗ്രൂപ്പ് അംഗങ്ങള്‍ക്കുള്ള ശില്‍പശാലകള്‍ സംസ്ഥാനത്തെ വിവിധ കേന്ദ്രങ്ങളില്‍ തുടങ്ങി. ഏപ്രില്‍ ആറുവരെ നീണ്ടുനില്‍ക്കും. അക്കാദമിക പ്രവര്‍ത്തനങ്ങളുടെ വളര്‍ച്ചയും തുടര്‍ച്ചയും എന്ന വിഷയത്തിലാണ് ശില്‍പശാലകള്‍ നടക്കുക.
മലയാളത്തിളക്കം, ഹലോ ഇംഗ്ലീഷ്, ഗണിതവിജയം, പഠനോത്സവം, ജൈവവൈവിധ്യ ഉദ്യാനം എന്നിവയെല്ലാം പോയവര്‍ഷം എങ്ങനെ സ്വാധീനിച്ചുവെന്നും തുടര്‍ച്ച എങ്ങനെയാകണമെന്നുമെല്ലാം ചര്‍ച്ചചെയ്യും. പഠനതന്ത്രങ്ങളും രൂപപ്പെടുത്തും.  പ്രൈമറി വിഭാഗത്തില്‍ മെയ് മൂന്നുമുതല്‍ ഏഴുവരെയും മെയ് എട്ടു മുതല്‍ 11 വരെയുമുള്ള രണ്ടു ഘട്ടങ്ങളിലായാണ് അക്കാദമിക ശില്‍പശാലകള്‍ നടക്കുക. ഏപ്രില്‍ 25 മുതല്‍ 29 വരെ തിയതികളാണ് ജില്ലാ റിസോഴ്‌സ് ഗ്രൂപ്പ് അംഗങ്ങള്‍ക്കുള്ള ശില്‍പശാലകള്‍ നടക്കുക.
സെക്കന്‍ഡറി വിഭാഗത്തില്‍ മെയ് 13 മുതല്‍ 16 വരെയും മെയ് 17 മുതല്‍ 21 വരെയും രണ്ടുഘട്ടങ്ങളിലായി ശില്‍പശാലകള്‍ നടത്താനാണ് തീരുമാനം. ഇതിനൊപ്പം കൈറ്റിന്റെ നേതൃത്വത്തിലായിരിക്കും അധ്യാപകര്‍ക്ക് നാലുദിവസത്തെ ഐ.ടി പരിശീലനം നല്‍കുക. ക്ലാസ് മുറികള്‍ ഹൈടെക് ആകുന്ന പശ്ചാത്തലത്തില്‍ കൂടിയാണ് ഐ.ടി പരിശീലനം നല്‍കുന്നത്. ഐ.ടി സംവിധാനങ്ങളുള്ള വിദ്യാലയങ്ങളായിരിക്കും പരിശീലന കേന്ദ്രങ്ങള്‍.  സെക്കന്‍ഡറി, ഹയര്‍ സെക്കന്‍ഡറി തലത്തില്‍ 45000 ത്തോളം ക്ലാസ് മുറികള്‍ ഹൈടെക് ആക്കിയ സാഹചര്യത്തില്‍ ഈ സൗകര്യം ഉപയോഗപ്പെടുത്തും. ഏപ്രില്‍ 26 മുതല്‍ ഐ.ടി പരിശീലനം ആരംഭിക്കും.