കോഴിക്കോട്: ദേശീയ സബ് ജൂനിയര്‍ ഫുട്‌ബോള്‍ ചാംപ്യന്‍ഷിപ്പില്‍ നിലവിലെ ജേതാക്കളായ പശ്ചിമ ബംഗാളിനെ ഒന്നിനെതിരേ നാല്‌ഗോളുകള്‍ക്ക് പരാജയപ്പെടുത്തി മേഘാലയ സെമിയുറപ്പാക്കി.
ഇന്നലെ വൈകിട്ട് നടന്ന മത്സരത്തില്‍ 16ാം മിനുട്ടില്‍ മാനവ് മല്ലിക്ക് നേടിയ ഒരു ഗോളിന് ബംഗാള്‍ മുന്നിട്ട് നിന്നെങ്കിലും 22ാം മിനുട്ടില്‍ മേഘാലയയുടെ ഡമൈത്ത് പാങ് ലിങ്‌ദോയുടെ ഷോട്ട് ബംഗാളിന്റെ സോം ദീപ് ഓരോന്റെ കാലില്‍ തട്ടി ഗോള്‍ പോസ്റ്റിലെത്തി. 36ാം മിനുട്ടില്‍ ഗ്ലെനീസ് ഗോഡ് ഫ്രെലിന്റോയുടെ ഗോളില്‍ മേഘാലയ ലീഡ് ഉയര്‍ത്തി.
45ാം മിനുട്ടില്‍ ഫെയര്‍ലി സുട്ടിന്‍ മൂന്നാം ഗോള്‍ നേടി. അധികസമയത്ത് ഗ്ലെനീസ് ഗോഡ് ഫ്രെലിന്റോ നാലാം ഗോളും വലയിലാക്കി. ഇന്നലെ നടന്ന ആദ്യ മത്സരത്തില്‍ ഗോവ എതിരില്ലാത്ത രണ്ട് ഗോളിന് തമിഴ്‌നാടിനെ പരാജയപ്പെടുത്തി.
ഗോവക്ക് വേണ്ടി 12, 45 മിനുട്ടുകളില്‍ രോഹന്‍ ജോസഫ് വികാസാണ് സ്‌കോര്‍ ചെയ്തത്. ഇന്ന് നടക്കുന്ന നിര്‍ണായക മത്സരത്തില്‍ ഒഡിഷ ഉത്തര്‍പ്രദേശിനേയും കേരളം മിസോറമിനേയും നേരിടും.