കൊല്ലം: സുപ്രിംകോടതി കേസ് തളളിയതോടെ ഇ.പി.എഫ് പെന്‍ഷന്‍ സ്‌കീമിന്റെ മാതൃനിയമത്തിന് വിരുദ്ധമായി ഇ.പി.എഫ് ഓര്‍ഗനൈസേഷന്‍ കൊണ്ടുവന്ന നിയമഭേദഗതികള്‍ റദ്ദ് ചെയ്ത ഹൈക്കോടതി വിധി പ്രാബല്യത്തില്‍ വന്നിരിക്കുകയാണെന്ന് എന്‍.കെ പ്രേമചന്ദ്രന്‍ പറഞ്ഞു.
നിയമവിരുദ്ധമായി കേന്ദ്ര സര്‍ക്കാരും ഇ.പി.എഫ്.ഒയും പുറപ്പെടുവിച്ചിട്ടുളള ഉത്തരവുകള്‍ നിലവില്ലിലാതായിരിക്കുന്നു. പരമോന്നത കോടതിയുടെ വിധി പ്രഖ്യാപനം വന്നതിനു ശേഷവും റദ്ദ് ചെയ്ത വ്യവസ്ഥകള്‍ പ്രകാരം നടപടികള്‍ തുടരുന്ന കേന്ദ്ര സര്‍ക്കാരിന്റെ നിലപാട് നീതിന്യായ വ്യവസ്ഥയോടുളള വെല്ലുവിളിയാണ്.
ഇ.പി.എഫ് പെന്‍ഷന്‍കാരുടെയും തൊഴിലാളികളുടെയും നിയമാനുസൃതമായ അവകാശത്തിന്‍മേലുള്ള കടന്നുകയറ്റമാണ് സര്‍ക്കാര്‍ നടത്തിയതെന്നുളളതുകൊണ്ടാണ് ഭേദഗതികളും ഉത്തരവുകളും ഹൈക്കോടതി ഡിവിഷന്‍ ബെഞ്ച് റദ്ദ് ചെയ്തത്.ഹൈക്കോടതി ഉത്തരവ് സാധൂകരിച്ചുകൊണ്ടുളളതാണ് സുപ്രിംകോടതി വിധി. യഥാര്‍ഥ ശമ്പളത്തിന്റെ അടിസ്ഥാനത്തില്‍ ഉയര്‍ന്ന പെന്‍ഷന്‍ എന്നത് എല്ലാ തൊഴിലാളികള്‍ക്കും ബാധകമാക്കുമെന്ന് ലോക്‌സഭയില്‍ തൊഴില്‍ വകുപ്പ് മന്ത്രി ഉറപ്പ് നല്‍കിയതാണ്.
ഉറപ്പിന് വിരുദ്ധമായി സര്‍ക്കാര്‍ ഉത്തരവ് പുറപ്പെടുവിച്ചപ്പോഴാണ് താന്‍ പ്രസിഡന്റായ യുനിയന്‍ ഹൈക്കോടതിയെ സമീപിച്ചതും അനുകൂല ഉത്തരവ് ലഭിച്ചതും. പാര്‍ലമെന്റില്‍ നടത്തിയ നിരന്തരമായ ഇടപെടലുകളും കോടതിയിലെ നിയമപോരാട്ടവും ഫലപ്രാപ്തിയിലെത്തിയെങ്കിലും ഉത്തരവ് നടപ്പാക്കുവാന്‍ കേന്ദ്ര സര്‍ക്കാര്‍ സ്വീകരിക്കുന്ന മേല്ലപോക്ക് നയം ന്യായികരിക്കാവുന്നതല്ല. ഇ.പി.എഫ് പെന്‍ഷന്‍കാരുടെ യഥാര്‍ഥ ശമ്പളത്തിന്റെ അടിസ്ഥാനത്തില്‍ ഉയര്‍ന്ന പെന്‍ഷന്‍ എന്ന അവകാശവും മാതൃനിയമത്തിലെ ആനുകൂല്യങ്ങളും അടിയന്തിരമായി പ്രാബല്യത്തില്‍ കൊണ്ടു വരണമെന്നും പ്രേമചന്ദ്രന്‍ ആവശ്യപ്പെട്ടു.