ഗുവാഹത്തി: ഇന്ന് വിശ്വാസ വോട്ടെടുപ്പ് നടക്കാനിരിക്കേ അരുണാചല്‍ പ്രദേശില്‍ നാടകീയ രംഗങ്ങള്‍. വിമത എം.എല്‍.എമാര്‍ വഴങ്ങാത്തതിനെത്തുടര്‍ന്ന് മുഖ്യമന്ത്രി സ്ഥാനത്തുനിന്ന് നബാം തുകി രാജിവച്ചു. പുതിയ നിയമസഭാ കക്ഷി നേതാവായി പേമ ഖണ്ഡുവിനെ ഇന്നു രാവിലെ ചേര്‍ന്ന കോണ്‍ഗ്രസ് എം.എല്‍.എമാരുടെ യോഗം തെരഞ്ഞെടുത്തു. ഇതേത്തുടര്‍ന്ന് ഇന്നു നടക്കാനിരുന്ന വിശ്വാസ വോട്ടെടുപ്പ് മാറ്റിവച്ചു.

നേതൃത്വം മാറിയാല്‍ തിരിച്ചെത്താമെന്ന 20 വിമത എം.എല്‍.എമാരുടെ നിലപാടിനെത്തുടര്‍ന്നാണ് നബാം തുകിക്ക് രാജിവച്ചൊഴിയേണ്ടി വന്നത്. ഇവരുടെ പിന്തുണ ലഭിച്ചാല്‍ 60 അംഗ നിയമസഭയില്‍ 35 എം.എല്‍.എമാരുടെ പിന്തുണയോടെ കോണ്‍ഗ്രസിന് ഭരണത്തില്‍ തുടരാനാവും.

21 എം.എല്‍.എമാര്‍ വിമതരായി പോയതിനെത്തുടര്‍ന്നാണ് അരുണാചല്‍ പ്രദേശില്‍ കഴിഞ്ഞ ജനുവരി 26ന് രാഷ്ട്രപതി ഭരണം ഏര്‍പ്പെടുത്തിയത്. ഈ എം.എല്‍.എമാരെയും പ്രതിപക്ഷ എം.എല്‍.എമാരെയും ചേര്‍ത്ത് ഗവര്‍ണര്‍ രൂപീകരിച്ച സര്‍ക്കാരിനെ തള്ളിക്കൊണ്ട് വന്ന സുപ്രിം കോടതി വിധിയെത്തുടര്‍ന്നാണ് കോണ്‍ഗ്രസ് സര്‍ക്കാര്‍ വീണ്ടും സ്ഥാനമേറ്റത്.