ധാക്ക: ബംഗ്ലാദേശില്‍ മുസ്‌ലിംകള്‍ തീവ്രവാദത്തിനെതിരേ രംഗത്തിറങ്ങണമെന്ന് ഇമാമുമാര്‍. രാജ്യത്തെ മൂന്ന് ലക്ഷം പള്ളികളില്‍ ജുമുഅ നിസ്‌കാരത്തിനു ശേഷമാണ് ഇമാമുമാര്‍ വിശ്വാസികളെ അഭിസംബോധന ചെയ്തത്.
സ്റ്റേറ്റ് ഇസ്‌ലാമിക് ഫൗണ്ടേഷന്‍ തയാറാക്കിയ പ്രസംഗമാണ് ഇമാമുമാര്‍ വായിച്ചത്. മനുഷ്യരെ കൊലപ്പെടുത്തുന്നത് അംഗീകരിക്കാനാകില്ല. ഇത്തരം മസ്തിഷ്‌ക പ്രക്ഷാളനം നടത്തുന്നവരുടെ വലയില്‍പ്പെട്ടുപോകാതെ തങ്ങളുടെ കുട്ടികളെ രക്ഷിതാക്കള്‍ സംരക്ഷിക്കണമെന്നും ഇമാമുമാര്‍ പറഞ്ഞു. മനുഷ്യരെ കൊലപ്പെടുത്തുകയാണ് ഏറ്റവും വലിയ പാപമെന്നാണ് പ്രവാചകാധ്യാപനം. മുസ്‌ലിംകള്‍ക്കും ഇതര സമുദായത്തിനും ഇടക്ക് ചേരിതിരിവുകള്‍ വേണ്ടെന്നും നാഷനല്‍ മസ്ജിദ് ഇമാം മുഹ്‌യുദ്ദീന്‍ ഖാസിം പറഞ്ഞു.  
ബംഗ്ലാദേശില്‍ ധാക്കയിലെ കഫേയിലും ഈദ് നിസ്‌കാരത്തിനിടെയും നടന്ന തീവ്രവാദി ആക്രമണങ്ങളുടെ പശ്ചാത്തലത്തിലാണ് ആഹ്വാനം. ഇരു ആക്രമണങ്ങളുടെയും ഉത്തരവാദിത്വം ഐ.എസ് ഏറ്റെടുത്തിരുന്നു. സര്‍ക്കാര്‍ അംഗീകാരമുള്ള പള്ളികളിലെല്ലാം സര്‍ക്കുലര്‍ വായിച്ചതായാണ് റിപ്പോര്‍ട്ട്.