ജിദ്ദ: ഈ വര്‍ഷത്തെ ഉംറ സീസണ്‍ അവസാനിച്ചതിനാല്‍ ഉംറ തീര്‍ഥാടകര്‍ 20നുമുമ്പ് തിരിച്ചുപോകണമെന്ന് ഹജ്ജ്, ഉംറ മന്ത്രാലയം അറിയിച്ചു. മക്കയിലും മദീനയിലും അവശേഷിക്കുന്ന മുഴുവന്‍ തീര്‍ഥാടകരെയും ഉംറ സേവന കമ്പനികള്‍ തിരിച്ചയക്കണം. തുടര്‍ന്ന് ഹജ്ജ് തീര്‍ഥാടകരെ സ്വീകരിക്കുന്നതിനു മുന്നോടിയായുള്ള അറ്റകുറ്റപ്പണികള്‍ പൂര്‍ത്തിയാക്കാന്‍ ടെര്‍മിനല്‍ ജൂലൈ 21 മുതല്‍ രണ്ടാഴ്ചത്തേയ്ക്ക് അടച്ചിടുമെന്നും മന്ത്രാലയം അറിയിച്ചു.
ഓഗസ്റ്റ് നാലു മുതല്‍ ഹജ്ജ് വിമാനങ്ങളുടെ വരവ് തുടങ്ങും. തീര്‍ഥാടകര്‍ക്ക് സേവനങ്ങള്‍ നല്‍കാന്‍ ഹജ്ജ് മന്ത്രാലയവും ഉംറ സേവന കമ്പനികളും നടത്തിയ ശ്രമങ്ങളെ മന്ത്രാലയം പ്രശംസിച്ചു.
ഉംറ വിസയിലും സന്ദര്‍ശക വിസയിലുമെത്തിയവര്‍ നിശ്ചിത സമയത്തിനുള്ളില്‍ തിരിച്ചു പോകണമെന്നും അല്ലാത്തപക്ഷം പിഴയും ശിക്ഷയുമുണ്ടാകുമെന്നും പാസ്‌പോര്‍ട്ട് വിഭാഗവും മുന്നറിയിപ്പുനല്‍കി. സഊദി നിയമമനുസരിച്ച് വിസ കാലവധി അവസാനിച്ച ശേഷവും രാജ്യത്തു തുടരുന്ന ഹജ്ജ് ഉംറ തീര്‍ഥാടകര്‍ക്ക് കുറഞ്ഞത് ആറുമാസം തടവും 50,000 റിയാല്‍ പിഴയുമാണ് നിലവിലെ ശിക്ഷ.