കാണ്‍പൂര്‍: വികാസ് ദുബെ കൊല്ലപ്പെട്ട സ്ഥലത്തു നിന്ന് പുലര്‍ച്ചെ തുടരെത്തുടരെ വെടിയൊച്ച കേട്ടിരുന്നതായി നാട്ടുകാര്‍. ശബ്ദം കേട്ട് ചെന്ന തങ്ങളെ പൊലിസ് അവിടേക്ക് അടുപ്പിച്ചില്ലെന്നും തിരിച്ചു പോവാന്‍ ആവശ്യപ്പെട്ടെന്നും ഇവര്‍ പറയുന്നു.

'വെടിയൊച്ച കേട്ട് ചെന്ന ഞങ്ങളോട് പൊലിസ് പോവാന്‍ ആവശ്യപ്പെട്ടു. വീട്ടിലേക്ക് പോവുന്ന വഴിയായിരുന്നു ഞങ്ങള്‍'- സമീപത്തുകാരനായ ആശിഷ് പവന്‍ പറയുന്നു. പരിക്കേറ്റവരെ അവരുടെ വാഹനത്തില്‍ തന്നെയാണ് ആശുപത്രയിലെത്തിച്ചതെന്നും ഇവര്‍ കൂട്ടിച്ചേര്‍ത്തു.

യു.പിയില്‍ എട്ട് പൊലിസ് ഉദ്യോഗസ്ഥരെ കൊലപ്പെടുത്തിയ സേംഭവത്തിലെ മുഖ്യപ്രതി മാഫിയ സംഘത്തലവന്‍ വികാസ് ദുബെ ഇന്ന് പുലര്‍ച്ചെയാണ് കൊല്ലപ്പെട്ടത്. അറസ്റ്റ് ചെയ്ത് കൊണ്ടുവരുന്നതിനിടെ വാഹനം അപകടത്തില്‍പ്പെട്ടപ്പോള്‍ ഓടാന്‍ ശ്രമിച്ച ദുബെയെ വെടിവെക്കുകയായിരുന്നുവെന്നാണ് പൊലിസ് പറയുന്നത്. മധ്യപ്രദേശില്‍ നിന്ന് കാണ്‍പൂരിലേക്ക് വന്ന പൊലിസ് ജീപ്പാണ് അപകടത്തില്‍പ്പെട്ടത്.

നേരത്തെ പിടിയിലായ മൂന്നു പേരെ പൊലിസ് വെടിവെച്ച് കൊന്നിരുന്നു. രക്ഷപ്പെടാന്‍ ശ്രമിക്കുന്നതിനിടെയാണ് കൊലപ്പെടുത്തിയതെന്നാണ് അതിനും പൊലിസ് നല്‍കിയ വിശദീകരണം. ദുബെയുടെ വലംകൈ എന്നറിയറിയപ്പെടുന്നഅമര്‍ ദുബെയും കൊല്ലപ്പെട്ടവരില്‍ ഉള്‍പെടുന്നു.