കൊച്ചി: കാര്‍ നിര്‍മാതാക്കളായ റെനോള്‍ട്ടിന്റെ പ്രീമിയം സ്‌പോര്‍ട്‌സ് യൂട്ടിലിറ്റി ബ്രാന്‍ഡായ ഡസ്റ്ററിന്റെ ഉടമകളുടെ കൂട്ടായ്മയായ ക്ലബ്ബ് ഓഫ് ഡസ്റ്റര്‍ എലൈറ്റ് (കോഡ്) നടത്തിയ റോഡ് സുരക്ഷാറാലി കളമശ്ശേരി റെനോള്‍ട്ട് ഷോറൂമില്‍ ആര്‍.ടി.ഒ കെ.എം ഷാജി ഫ്‌ളാഗ് ഓഫ് ചെയ്തു. 

റോഡ് സുരക്ഷയെക്കുറിച്ചും ട്രാഫിക് നിയമങ്ങളെക്കുറിച്ചും പൊതുജനങ്ങളില്‍ അവബോധം സൃഷ്ടിക്കുന്നതിനായി റെനോള്‍ട്ടും ടി.വി.എസും സംയുക്തമായാണ് റാലി സംഘടിപ്പിച്ചത്. 20 ഡസ്റ്റര്‍ കാറുകളിലായി 40 പേര്‍ പങ്കെടുത്ത റോഡ് സുരക്ഷാ റാലി കളമശ്ശേരിയില്‍ നിന്നാരംഭിച്ച് നെല്ലിയാമ്പതിയില്‍ അവസാനിച്ചു.
ബോധവല്‍ക്കരണത്തിന്റെ ഭാഗമായി പൊലിസിന്റെയും മോട്ടോര്‍ വാഹന വകുപ്പിന്റെയും സഹകരണത്തോടെ പാലിയേക്കര ടോള്‍ പ്ലാസ്സയില്‍ റോഡു നിയമങ്ങളടങ്ങിയ ലഘുലേഖകള്‍ വിതരണം ചെയ്തു. സി.എസ്.ആര്‍ പ്രവര്‍ത്തനങ്ങളുടെ ഭാഗമായി കോഡ് ഇത്തരത്തില്‍ നിരവധി ബോധവല്‍ക്കരണ പരിപാടികള്‍ സംഘടിപ്പിച്ചു വരുന്നുണ്ട്. ടി.വി.എസ് സീനിയര്‍ വൈസ് പ്രസിഡന്റ് തോമസ് സ്റ്റീഫന്‍, മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ബിജു ഐസക് എന്നിവര്‍ റാലിക്ക് നേതൃത്വം നല്‍കി.