കൊച്ചി: 1993ലെ കേരള പിന്നാക്ക സമുദായ നിയമം 11ാം വകുപ്പ് പ്രകാരം സംസ്ഥാനത്തെ സംവരണപട്ടിക ഉടന്‍ പുനഃപരിശോധിക്കണമെന്ന് സംവരണ സംരക്ഷണ കണ്‍വന്‍ഷന്‍ പ്രമേയത്തിലൂടെ ആവശ്യപ്പെട്ടു. ഓരോ പത്ത് വര്‍ഷം കൂടുമ്പോഴും സംവരണ പട്ടിക പുതുക്കണമെന്നാണ് സുപ്രിംകോടതി വിധി. സംവരണ പട്ടിക പുനഃപരിശോധിക്കുമ്പോള്‍ വേണ്ടത്രപ്രാതിനിധ്യം നേടിയ സമുദായങ്ങളെ ഒഴിവാക്കി കൂടുതല്‍ പ്രാതിനിധ്യം അര്‍ഹിക്കുന്ന സമുദായങ്ങള്‍ക്ക് അത് നല്‍കി പ്രശ്‌നത്തിന് പരിഹാരം കാണണമെന്നും സുപ്രിംകോടതി വ്യക്തമാക്കിയിട്ടുണ്ട്. എന്നാല്‍ 26 വര്‍ഷം കഴിഞ്ഞിട്ടും കേരള സര്‍ക്കാര്‍ ഇതുവരെ യാതൊരു നടപടിയും സ്വീകരിച്ചിട്ടില്ല. 27 ശതമാനം ജനസംഖ്യയുള്ള മുസ്‌ലിം സമുദായത്തിന് വെറും 12ശതമാനം മാത്രമാണ് ഇപ്പോള്‍ സംവരണം. ആറാമത് ഉദ്യോഗമാണ് മുസ്‌ലിമിനു ലഭിക്കുന്നതെന്നും പ്രമേയത്തില്‍ ചൂണ്ടിക്കാട്ടി. സംവരണലിസ്റ്റ് പുതുക്കാന്‍ സര്‍ക്കാന്‍ തയാറായില്ലെങ്കില്‍ സുപ്രിംകോടതിയെ സമീപിച്ച് മുസ്‌ലിം സമുദായത്തിന് നീതി ഉറപ്പാക്കണമെന്നും കണ്‍വന്‍ഷന്‍ ആവശ്യപ്പെട്ടു.
മൈനോറിറ്റി ഇന്ത്യന്‍സ് പ്ലാനിങ് ആന്‍ഡ് വിജിലന്‍സ് കമ്മിഷന്‍ ട്രസ്റ്റ് സംഘടിപ്പിച്ച കണ്‍വന്‍ഷന്‍ മനുഷ്യാവകാശ പ്രവര്‍ത്തക ടീസ്റ്റ സെറ്റല്‍വാദ് ഉദ്ഘാടനം ചെയ്തു. മോദി സര്‍ക്കാര്‍ സ്വന്തം രാജ്യത്തെ ജനങ്ങളോടാണ് യുദ്ധം പ്രഖ്യാപിച്ചിരിക്കുന്നതെന്ന് അവര്‍ അഭിപ്രായപ്പെട്ടു. അഞ്ച് വര്‍ഷത്തെ മോദി ഭരണം രാജ്യത്തെ നൂറ് കൊല്ലം പിന്നോട്ടടിച്ചിരിക്കുകയാണ്. വീണ്ടും നൂറുകൊല്ലം പിന്നോട്ട് നടക്കണോ അതോ നല്ല നാളെയിലേക്ക് ചുവടുവയ്ക്കണോ എന്ന് തീരുമാനിക്കേണ്ട നിര്‍ണായക ഘട്ടമാണിതെന്നും അവര്‍ ഓര്‍മിപ്പിച്ചു. മത ന്യൂനപക്ഷങ്ങളെ നിശബ്ദരാക്കുന്ന പ്രവര്‍ത്തനങ്ങളാണ് നടന്നുകൊണ്ടിരിക്കുന്നതെന്നും ടീസ്റ്റ പറഞ്ഞു.
ട്രസ്റ്റ് ചെയര്‍മാന്‍ അഡ്വ. വി.കെ ബീരാന്‍ അധ്യക്ഷനായി. എന്‍.പി ജിഷാര്‍, സലാഹുദ്ദീന്‍ മദനി എന്നിവര്‍ മുഖ്യപ്രഭാഷണം നടത്തി. ആര്‍ക്കിടെക്റ്റ് ഡോ.സി. നജീബ്, എച്ച്.ഇ മുഹമ്മദ് ബാബു സേഠ്, ഷക്കീല്‍ മുഹമ്മദ്, ഹുസൈന്‍ കോയ തങ്ങള്‍ സംസാരിച്ചു.