ശ്രീകാര്യം : ലയോള- ആക്കുളം റോഡില്‍ കൊപ്രാപ്പുരയ്ക്ക് തീപിടിച്ചു. ലക്ഷങ്ങളുടെ നഷ്ടം. ലയോള റോഡില്‍ പ്രവര്‍ത്തിക്കുന്ന ബാലചന്ദ്ര ഓയില്‍ മില്ലിലെ കൊപ്രാപ്പുരയാണ് ശനിയാഴ്ച രാത്രി എട്ട് മണിയോടെ കത്തിയത്. ശനിയാഴ്ച രാത്രി തൊഴിലാളികള്‍ കൊപ്ര ഉണക്കുന്നതിന് ഗോഡൗണിലെ ഡ്രൈയറിലിട്ട് തീ കത്തിച്ചിരുന്നു. ഇവിടെ നിന്നാകാം തീ പടര്‍ന്നതെന്ന് കരുതുന്നു. ആസ്ബസ്‌റ്റോസ് ഷീറ്റിട്ട ഗോഡൗണാണ് കത്തി നശിച്ചത്. മേല്‍ക്കൂരയിലുള്ള ഷീറ്റുകള്‍ സ്‌പോടന ശബ്ദത്തോടെ പൊട്ടിത്തെറിച്ചത് സമീപ വാസികളെ പരിഭ്രാന്തിയിലാക്കി.
സ്ഥലത്തെത്തിയ ശ്രീകാര്യം പൊലിസും കഴക്കൂട്ടം, ചെങ്കല്‍ച്ചൂള എന്നിവിടങ്ങളില്‍ നിന്നെത്തിയ ഫയര്‍ഫോഴ്‌സും ഒരു മണിക്കൂറോളം പരിശ്രമിച്ചാണ് തീയണച്ചത്. ഇതേ തുടര്‍ന്ന് ലയോള റോഡില്‍ ഒരു മണിക്കൂറോളം ഗതാഗതം തടസ്സപ്പെട്ടു.