തിരുവനന്തപുരം: നഗരത്തില്‍ കിഴക്കേക്കോട്ടയില്‍ ബസുകള്‍ക്കിടയില്‍ ഞെരുങ്ങി യുവാവിന് ദാരുണാന്ത്യം. കേരള ബാങ്ക് ജീവനക്കാരനായ ഉല്ലാസാണ് മരിച്ചത്. റോഡ് മുറിച്ചു കടക്കുന്നതിനിടെ പ്രൈവറ്റ് ബസിനും കെ.എസ്.ആര്‍.ടി.സി ബസിനും ഇടയില്‍ കുടുങ്ങുകയായിരുന്നു. ഉടന്‍ തന്നെ പൊലീസ് വാഹനത്തില്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

യുടേണ്‍ എടുത്ത കെ.എസ്.ആര്‍.ടി.സി ബസിനു മുന്നില്‍ ഉല്ലാസ് നില്‍ക്കുമ്പോള്‍ മറ്റൊരു സ്വകാര്യ ബസ് കെ.എസ്.ആര്‍.ടി.സി ബസിനു മുന്നിലേക്ക് യു ടേണ്‍ എടുക്കുകയായിരുന്നു. ഇതോടെ രണ്ടു ബസുകള്‍ക്കും ഇടയില്‍പെട്ട് ഉല്ലാസ് ഞെരിഞ്ഞമര്‍ന്നു. സംഭവത്തില്‍ ഇരു ബസ് ഡ്രൈവര്‍മാരെയും തിരുവനന്തപുരം ഫോര്‍ട്ട് പൊലിസ് അറസ്റ്റ് ചെയ്തു. മരിച്ച ഉല്ലാസിന്റെ മൃതദേഹം തിരുവനന്തപുരം മെഡിക്കല്‍ കോളേജിലേക്ക് മാറ്റിയിട്ടുണ്ട്.