ന്യൂഡല്‍ഹി: നോട്ടുനിരോധനത്തില്‍ ബി.ജെ.പി അധ്യക്ഷന്‍ അമിത്ഷാ ഉള്‍പ്പെട്ട അഴിമതിക്കഥ പുറത്തായത് ടി.എന്‍.എസ് വേള്‍ഡ് എന്ന വാര്‍ത്താ വെബ്‌സൈറ്റ് നടത്തിയ ഒളികാമറ ഓപ്പറേഷനിലൂടെ. ഇതിന്റെ നിരവധി വിഡിയോകള്‍ അവരുടെ വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.
ലേഖകന്‍ കരണ്‍ ഒളികാമറയുമായി നോട്ട്മാറ്റിയെടുക്കാനുള്ള ആളെന്ന വ്യാജേന കാബിനറ്റ് സെക്രട്ടേറിയറ്റ് അസിസ്റ്റന്റ് രാഹുല്‍ രത്‌രേക്കറിനെ സമീപിക്കുന്നതാണ് ഒരു വിഡിയോ. തന്റെ ഔദ്യോഗിക തിരിച്ചറിയല്‍ കാര്‍ഡ് രാഹുല്‍ ലേഖകനെ കാണിക്കുന്നുണ്ട്. എങ്ങനെയാണ് നോട്ട് മാറ്റിയെടുക്കുകയെന്ന് വിഡിയോയില്‍ രാഹുല്‍ വിശദീകരിക്കുന്നു. മുംബൈയിലെ ട്രിഡന്റ് ഹോട്ടലില്‍ രാഹുലും ഭാര്യയും ഇരുന്ന് കാര്യങ്ങള്‍ വിശദീകരിക്കുന്നതാണ് മറ്റൊരു വിഡിയോ. ഇതില്‍ ഒരു ലക്ഷം കോടി വിദേശത്തുനിന്ന് അച്ചടിച്ച് ഇന്ത്യയിലേക്ക് എങ്ങനെ എത്തിച്ചുവെന്നും വിശദീകരിക്കുന്നു.
15 ശതമാനമായിരുന്നു ആദ്യം പഴയ നോട്ട് മാറ്റിയെടുക്കാനുള്ള കമ്മിഷന്‍. പിന്നീടത് 35-40 ശതമാനം വരെ ആക്കി. അമിത്ഷായാണ് ഇത് നിയന്ത്രിക്കുന്നതെന്നും രാഹുല്‍ പറയുന്നു.

പ്രധാനമന്ത്രിയുടെ ഓഫിസില്‍ ഇക്കാര്യങ്ങളെല്ലാം ചെയ്യാന്‍ ഒരു പ്രത്യേക വകുപ്പ് തന്നെയുണ്ട്. 26 പേര്‍ ഇതിനായി പ്രവര്‍ത്തിക്കുന്നു. 20,000 കോടി ഇതിനകം ഇടപാട് നടത്തിക്കഴിഞ്ഞതായും രാഹുല്‍ പറയുന്നു. നോട്ട്‌നിരോധനം നടക്കുന്ന നവംബറിന് ആറുമാസം മുന്‍പാണ് ഉര്‍ജിത് പട്ടേലിന്റെ ഒപ്പുള്ള നോട്ടുകള്‍ അച്ചടിച്ചതെന്ന് പറയുന്ന രാഹുല്‍, റോയില്‍ പ്രവര്‍ത്തിച്ചതിന്റെ അനുഭവങ്ങളും വിഡിയോയില്‍ പങ്കുവയ്ക്കുന്നുണ്ട്.

ലേഖകന്‍ കരണ്‍, ഇന്‍ഡസ്‌ലാന്‍ഡ് ബാങ്കിന്റെ മുംബൈ പോര്‍ട്ട് ബ്രാഞ്ച് മാനേജര്‍ സഞ്ജയ് ചന്നെയുമായി ഇടപാട് സംബന്ധിച്ച് സംസാരിക്കുന്നതാണ് മറ്റൊന്ന്. രണ്ടോ മൂന്നോ ദിവസത്തിനുള്ളില്‍ കാര്യങ്ങള്‍ ശരിയാക്കാമെന്ന് ചന്നെ പറയുന്നു. മറ്റൊരു വിഡിയോ 320 കോടിയുടെ പഴയ കറന്‍സി മാറുന്നത് സംബന്ധിച്ച് ലേഖകന്‍ ചന്നെയുമായി ബാങ്കിനുള്ളില്‍ കരാറുറപ്പിക്കുന്നതാണ്.

രാഹുലും ലേഖകനും ചന്നെയും ചേര്‍ന്ന് ഇതു സംബന്ധിച്ച് ചര്‍ച്ചനടത്തുന്നതാണ് മറ്റൊരു വിഡിയോ. ഇവര്‍ പിന്നീട് ലേഖകനെ മഹാരാഷ്ട്ര ഇന്‍ഡസ്ട്രിയല്‍ ഡവലപ്‌മെന്റ് കോര്‍പ്പറേഷന്‍ ഗോഡൗണില്‍ കൊണ്ടുപോയി പെട്ടിയില്‍ അടുക്കിവച്ച കോടികളുടെ പുതിയ നോട്ടുകള്‍ കാണിക്കുന്നതാണ് മറ്റൊരു വിഡിയോ.
മറ്റൊരു വിഡിയോയില്‍ സഞ്ജയ് ചന്നെ ദേശീയ സുരക്ഷാ ഉപദേഷ്ടാവ് അജിത് ഡോവല്‍, അമിത്ഷായുടെ മകന്‍ ജയ്ഷാ, ഗുജറാത്ത് ഉപമുഖ്യമന്ത്രി നിതിന്‍ പട്ടേല്‍ എന്നിവരെക്കുറിച്ച് ലേഖകനോട് പറയുന്നു. നിതിന്‍ പട്ടേലിനെ നോട്ടുകെട്ടുകള്‍ കാണിക്കുന്നതിന്റെ വിഡിയോ ചന്നെ ലേഖകനെ തന്റെ മൊബൈലില്‍ കാണിക്കുന്നുണ്ട്. .