ചേളാരി: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ഏപ്രില്‍ 14,15 തിയതികളില്‍ നടത്തുന്ന പൊതുപരീക്ഷയുടെ മേല്‍നോട്ടത്തിന് നിയമിതരായ ഡിവിഷന്‍ സൂപ്രണ്ടുമാര്‍ക്കുള്ള പരിശീലനം ചേളാരി സമസ്താലയത്തില്‍ നടന്നു.

പരീക്ഷാ ബോര്‍ഡ് ചെയര്‍മാന്‍ എം.ടി അബ്ദുല്ല മുസ്‌ലിയാര്‍ ഉദ്ഘാടനം ചെയ്തു. മാനേജര്‍ കെ. മോയിന്‍കുട്ടി മാസ്റ്റര്‍ അധ്യക്ഷനായി. കെ.സി അഹമ്മദ് കുട്ടി മൗലവി, കെ.പി അബ്ദുറഹിമാന്‍ മുസ്‌ലിയാര്‍, കുടക് അബ്ദുറഹിമാന്‍ മുസ്‌ലിയാര്‍, കെ.കെ ഇബ്രാഹീം മുസ്‌ലിയാര്‍, പുത്തലം അബ്ദുറസാഖ് മുസ്‌ലിയാര്‍ സംബന്ധിച്ചു. കെ.എച്ച് കോട്ടപ്പുഴ സ്വാഗതവും കെ. മൊയ്തീന്‍ ഫൈസി നന്ദിയും പറഞ്ഞു.

നാളെ വൈകുന്നേരം 3 ന് 130 ഡിവിഷന്‍ കേന്ദ്രങ്ങളില്‍ സൂപ്പര്‍വൈസര്‍മാര്‍ക്കുള്ള പരിശീലനം നല്‍കും. 9,702 സൂപ്പര്‍വൈസര്‍മാരെയാണ് ഈ വര്‍ഷത്തെ പരീക്ഷാ ഡ്യൂട്ടിക്ക് നിയോഗിച്ചത്. 2,41,805 വിദ്യാര്‍ഥികളാണ് ഈ വര്‍ഷത്തെ പൊതുപരീക്ഷയില്‍ പങ്കെടുക്കുന്നത്. പരീക്ഷാ നടത്തിപ്പിന് മദ്‌റസ മാനേജിങ് കമ്മിറ്റി വേണ്ട സൗകര്യങ്ങള്‍ ചെയ്ത് കൊടുക്കണമെന്നും ഡ്യൂട്ടിക്ക് നിയോഗിക്കപ്പെട്ട സൂപ്പര്‍വൈസര്‍മാര്‍ പരിശീലനത്തിന് കൃത്യസമയത്ത് സംബന്ധിക്കണമെന്നും പരീക്ഷാ ബോര്‍ഡ് ചെയര്‍മാന്‍ അഭ്യര്‍ഥിച്ചു.