തൊഴിയൂര്‍: സമസ്ത കേരള ജംഇയ്യത്തുല്‍ ഉലമ സീനിയര്‍ മുശാവറ മെമ്പറും, തൊഴിയൂര്‍ ദാറു റഹ്മ അനാഥാലയ-വൈജ്ഞാനിക സമുച്ചയത്തിന്റെ സ്ഥാപകനും, ദീര്‍ഘകാല സെക്രട്ടറിയുമായിരുന്ന മര്‍ഹൂം തൊഴിയൂര്‍ കുഞ്ഞുമുഹമ്മദ് മുസ്‌ല്യാരുടെ ആണ്ടുനേര്‍ച്ചക്ക് സമാരംഭം.
എസ്.കെ.ജെ.എം ജില്ലാ പ്രസിഡന്റും ഉസ്താദിന്റെ ശിഷ്യനുമായ പി.ടി കുഞ്ഞുമുഹമ്മദ് മുസ്‌ലിയാര്‍ ഖത്മുല്‍ ഖുര്‍ആന്‍ ആരംഭിച്ചുകൊണ്ടാണ് തുടക്കം കുറിച്ചത്.
ഇനിയുള്ള ദിന രാത്രങ്ങളില്‍ ദാറു റഹ്മയില്‍ നിന്നും ഉസ്താദിന്റെ ശിഷ്യഗണങ്ങളില്‍ നിന്നുമെല്ലാം അനേകം ഖത്മുകളാണ് അവിടുത്തെ ഹള്‌റത്തിലേക്ക് എത്താനിരിക്കുന്നത്.
ഈ മഹാനവര്‍കള്‍ക്കായി എല്ലാവരം ഖത്മുല്‍ ഖുര്‍ആനില്‍ പങ്കാളികളാവണമെന്ന് അധ്യക്ഷനും ദാറു റഹ്മയുടെ സെക്രട്ടറിയുമായ കരീം ഫൈസി പൈങ്കണ്ണിയൂര്‍ പറഞ്ഞു. ആഗസ്റ്റ് ഏഴിന് ദാറു റഹ്മ അങ്കണത്തില്‍ വെച്ചാണ് ആണ്ടുനേര്‍ച്ചയുടെ സമാപനം, മഖാം സിയാറത്ത്, തഹ്ലീല്‍, ആദര്‍ശ സമ്മേളനം, ദുആ മജ്‌ലിസ്, അനുസമരണ സമ്മേളനം എന്നിവയും അതോടനുബന്ധിച്ച് നടക്കും. തൃശൂര്‍ ജില്ലക്ക് ദീനീ രംഗത്തും പ്രാസ്ഥാനിക രംഗത്തും നേതൃത്വം നല്‍കിയ മഹാനവര്‍കളുടെ ആണ്ടുനേര്‍ച്ചയില്‍ സയ്യിദ് ഹൈദരലി ശിഹാബ് തങ്ങള്‍ പാണക്കാട്, എ.പി മുഹമ്മദ് മുസ്ലിയാര്‍ കുമരംപുത്തൂര്‍, പ്രൊഫ.കെ.ആലിക്കുട്ടി മുസ്‌ലിയാര്‍, കോട്ടുമല ടി.എം ബാപ്പു മുസ്‌ലിയാര്‍, വി.കെ ഇബ്രാഹീം കുഞ്ഞ് എം.എല്‍.എ, സയ്യിദ് മുഹമ്മദ് കോയ തങ്ങള്‍ ജമലുല്ലൈലി, എസ്.എം.കെ തങ്ങള്‍, ചെറുവാളൂര്‍ ഉസ്താദ്, എം.എം മുഹ്‌യുദ്ദീന്‍ മൗലവി ആലുവ, റഹ്മത്തുള്ള ഖാസിമി മുത്തേടം പങ്കെടുക്കും.