തിരുവനന്തപുരം: വയനാട് ദുരന്തബാധിതര്‍ക്കാര്‍ കേന്ദ്രസര്‍ക്കാര്‍ ഉടന്‍ പ്രത്യേക പാക്കേജ് പ്രഖ്യാപിക്കുമെന്ന് ഉറപ്പുലഭിച്ചതായി കേരളത്തിന്റെ പ്രത്യേക പ്രതിനിധി കെവി തോമസ് വ്യക്തമാക്കി. 

ഉദ്യോഗസ്ഥരുടെ റിപ്പോര്‍ട്ട് ധനമന്ത്രിക്ക് ലഭിച്ചതായും കൂടുതല്‍ സാങ്കേതിക തടസം ഉണ്ടാകില്ലെന്നും കേന്ദ്രധനമന്ത്രി അറിയിച്ചതായി കെ.വി തോമസ് മാധ്യമങ്ങളോട് പറഞ്ഞു.

വയനാട് ദുരന്തത്തില്‍ പ്രത്യേക പാക്കേജ് അനുവദിക്കുന്നതുമായി ബന്ധപ്പെട്ട് കേന്ദ്ര ധനകാര്യമന്ത്രി നിര്‍മല സീതാരാമനുമായി കെവി തോമസ് ഇന്ന് കൂടിക്കാഴ്ച നടത്തിയിരുന്നു. അതിന് പിന്നാലെയാണ് കെവി തോമസിന്റെ പ്രതികരണം. പ്രധാനമന്ത്രി തിരിച്ചെത്തിയതിനു ശേഷം വയനാട് പാക്കേജ് സംബന്ധിച്ച് തീരുമാനം എടുക്കാമെന്ന് ധനമന്ത്രി ഇക്കഴിഞ്ഞ 19ന് കൊച്ചിയില്‍ വെച്ച് അറിയിച്ചിരുന്നു.