ഗൂഡല്ലൂര്‍: വനത്തില്‍ ഭൂമിക്കടിയില്‍ നിന്ന് പുക ഉയര്‍ന്നത് പരിഭ്രാന്തി പരത്തി. ഊട്ടിക്കടുത്ത നീന്തി വനത്തിലാണ് സംഭവം. അല്‍പസമയം പുക ഉയര്‍ന്ന ശേഷം അപ്രത്യക്ഷമാകുകയായിരുന്നു. പുക ഉയര്‍ന്ന ഭാഗത്തെ ചെടികള്‍ പൂര്‍ണമായും കരിഞ്ഞുണങ്ങിയിട്ടുണ്ട്. നാട്ടുകാര്‍ വിവരമറിയിച്ചതിനെ തുടര്‍ന്ന് സ്ഥലത്തെത്തിയ അധികൃതര്‍ സംഭവ സ്ഥലം പരിശോധിച്ചു. ഭൂകമ്പം മൂലമോ, മണ്ണിടിച്ച ലിനെ തുടര്‍ന്നോ ഭൂമിക്കടിയിലായ മരങ്ങള്‍ കരിയാവുകയും അന്തരീക്ഷ ഊഷ്മാവ് വര്‍ധിച്ചതോടെ ഭൂമിക്കടിയില്‍ തീ രൂപപ്പെട്ടതാകാം പുക ഉയരാന്‍ കാരണമെന്നാണ് അധികൃതര്‍ പറയുന്നത്. ഇതു സംബന്ധിച്ച് കൂടുതല്‍ പഠനം നടത്തുമെന്നും ബന്ധപ്പെട്ടവര്‍ അറിയിച്ചു. പത്ത് വര്‍ഷം മുന്‍പും ഇതേ സ്ഥലത്ത് നിന്ന് പുക ഉയര്‍ന്നിരുന്നു.