കാസര്‍കോട്: കാസര്‍കോട്ടെ യു.ഡി.എഫ് സ്ഥാനാര്‍ഥി രാജ്‌മോഹന്‍ ഉണ്ണിത്താന്‍ തെരഞ്ഞെടുപ്പ് ചട്ടം ലംഘിച്ചുവെന്ന് ചട്ടലംഘനം പരിശോധിക്കുന്ന സ്‌ക്രീനിങ് കമ്മിറ്റി മുഖ്യ വരണാധികാരിയായ കലക്ടര്‍ക്ക് റിപ്പോര്‍ട്ട് നല്‍കി.
ഇടതുമുന്നണി ലോക്‌സഭാ മണ്ഡലം കണ്‍വീനര്‍ ടി.വി രാജേഷ് എം.എല്‍.എയാണ് ഉണ്ണിത്താന്‍ ചട്ടലംഘനം നടത്തിയെന്നു കാണിച്ച് കാസര്‍കോട് ജില്ലാ കലക്ടര്‍ ഡോ. ഡി. സജിത്ത്ബാബുവിനു പരാതി നല്‍കിയത്. ഈ പരാതിയാണ് ചട്ടലംഘനം പരിശോധിക്കുന്ന സ്‌ക്രീനിങ് കമ്മിറ്റി കലക്ടറുടെ നിര്‍ദേശപ്രകാരം പരിശോധിച്ചത്. ശബരിമല വിഷയത്തെക്കുറിച്ചുള്ള പരാമര്‍ശമാണ് ചട്ടലംഘനമായി കണക്കാക്കിയിരിക്കുന്നത്.
ശബരിമല വിഷയത്തില്‍ ഉണ്ടായ സുപ്രിംകോടതി വിധിയെ വോട്ടര്‍മാര്‍ക്കിടയില്‍ തെറ്റിദ്ധരിപ്പിക്കുന്ന രീതിയില്‍ പ്രസംഗിച്ചുവെന്നാണ് പരാതിയില്‍ പറയുന്നത്. ഉണ്ണിത്താന്‍ നടത്തിയ പ്രസംഗത്തിന്റെ വിഡിയോയും ടി.വി രാജേഷ് എം.എല്‍.എ കലക്ടര്‍ക്കു നല്‍കിയ പരാതിക്കൊപ്പം കൈമാറിയിരുന്നു. വിവിധയിടങ്ങളില്‍ ഉണ്ണിത്താന്‍ ഇത്തരത്തില്‍ പ്രസംഗിച്ചുവെന്നായിരുന്നു ഇടതുമുന്നണിയുടെ പരാതി. സ്‌ക്രീനിങ് കമ്മിറ്റി പരാതി പരിശോധിച്ച ശേഷം ഇന്നലെ വൈകുന്നേരമാണ് ഉണ്ണിത്താന്‍ ചട്ടം ലംഘിച്ചുവെന്ന കണ്ടെത്തല്‍ അടങ്ങുന്ന റിപ്പോര്‍ട്ട് കലക്ടര്‍ക്കു കൈമാറിയത്.