കോഴിക്കോട്: പ്രവാസി സമ്പന്നരുമായുള്ള എ. പ്രദീപ് കുമാറിന്റെ ബന്ധം സി.പി.എം അന്വേഷിക്കണമെന്ന് ഡി.സി.സി പ്രസിഡന്റ് അഡ്വ. ടി. സിദ്ദീഖ്. മലബാറിലെ ഏറ്റവും പ്രമുഖ ഫുട്‌ബോള്‍ നഗരമായ കോഴിക്കോട് ഫുട്‌ബോള്‍ മാപ്പില്‍ നിന്ന് ഉന്മൂലനം ചെയ്യപ്പെട്ടത് ഈ കൂട്ടുകെട്ടിന്റെ ദുരന്തമാണ്. കോഴിക്കോട് ജില്ലാ ഫുട്‌ബോള്‍ അസോസിയേഷന്‍ (കെ.ഡി.എഫ്.എ) പ്രസിഡന്റ് എന്ന നിലയില്‍ പ്രദീപ് കുമാര്‍ കോഴിക്കോടന്‍ ഫുട്‌ബോളിനെ തകര്‍ത്തു. അദ്ദേഹത്തിന് ശേഷം പ്രവാസികളായ് മലപ്പുറത്ത് നിന്ന് മുഹമ്മദും പാലക്കാട്ടുകാരനായ ഡോ. സിദ്ദീഖ് അഹമ്മദും ഇപ്പോള്‍ കാസര്‍കോട്ടുകാരനായ അസീസ് അബ്ദുല്ലയും കെ.ഡി.എഫ്.എ തലപ്പത്ത് അവരോധിക്കപ്പെട്ടതില്‍ എന്ത് നേട്ടമാണുണ്ടായത്. ഇതിന് പിന്നിലുള്ള താല്‍പര്യമെന്തെന്നും പ്രദീപ് കുമാര്‍ വിശദീകരിക്കണം. ഇക്കാര്യത്തില്‍ സി.പി.എം നിലപാട് വ്യക്തമാക്കണമെന്നും സിദ്ദീഖ് ആവശ്യപ്പെട്ടു. യു.ഡി.എഫ് സൗത്ത് മണ്ഡലം തെരഞ്ഞെടുപ്പ് കമ്മിറ്റി അവലോകന യോഗത്തില്‍ സംസാരിക്കുകയായിരുന്നു അദ്ദേഹം.
മുസ്‌ലിം ലീഗ് സംസ്ഥാന വൈസ് പ്രസിഡന്റ് എം.സി മായിന്‍ ഹാജി ഉദ്ഘാടനം ചെയ്തു. സൗത്ത് യു.ഡി.എഫ് ചെയര്‍മാന്‍ അഡ്വ. എസ്.വി ഉസ്മാന്‍കോയ അധ്യക്ഷനായി. എന്‍.സി അബൂബക്കര്‍, ആദം മുല്‍സി, അഡ്വ. പി.എം നിയാസ് സംസാരിച്ചു. മണ്ഡലം ജനറല്‍ കണ്‍വീനര്‍ ഹാഷിം മനോളി സ്വാഗതവും ട്രഷറര്‍ എസ്.കെ അബൂബക്കര്‍ കോയ നന്ദിയും പറഞ്ഞു.