മുക്കം: വയനാട് ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി രാഹുല്‍ ഗാന്ധിക്ക് വോട്ടഭ്യര്‍ഥിക്കാന്‍ ജനങ്ങളെ കാണുക യു.ഡി.എഫ് സംസ്ഥാന നേതാക്കളും എം.എല്‍.എമാരും.
ഇവരുടെ നേതൃത്വത്തിലായിരിക്കും ബൂത്തുകളിലടക്കം പര്യടനം നടത്തുക. ഒപ്പം കോണ്‍ഗ്രസ് ദേശീയ നേതാക്കളുടെ വന്‍നിരയും മണ്ഡലത്തിലെത്തും.
രാഹുല്‍ ഗാന്ധിക്ക് രാജ്യം മുഴുവന്‍ സഞ്ചരിക്കേണ്ട സാഹചര്യത്തിലാണ് പര്യടനത്തിന്റെ ചുമതല മുതിര്‍ന്ന നേതാക്കളും എം.എല്‍.എമാരും ഏറ്റെടുക്കുന്നതെന്ന് തെരഞ്ഞെടുപ്പ് കമ്മിറ്റി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. പര്യടന പരിപാടികള്‍ 20ന് പൂര്‍ത്തിയാകും.സുല്‍ത്താന്‍ ബത്തേരി മണ്ഡലത്തില്‍ വയനാട് ഡി.സി.സി പ്രസിഡന്റ് ഐ.സി ബാലകൃഷ്ണന്‍ എം.എല്‍.എ, വണ്ടൂര്‍ മണ്ഡലത്തില്‍ എ.പി അനില്‍കുമാര്‍ എം.എല്‍.എ, ഏറനാട് മണ്ഡലത്തില്‍ പി.കെ ബഷീര്‍ എം.എല്‍.എ, നിലമ്പൂര്‍ മണ്ഡലത്തില്‍ മുന്‍ മന്ത്രി ആര്യാടന്‍ മുഹമ്മദ്, തിരുവമ്പാടി മണ്ഡലത്തില്‍ പ്രതിപക്ഷ ഉപനേതാവ് ഡോ. എം.കെ മുനീര്‍, പി.സി വിഷ്ണുനാഥ്, എം.എല്‍.എമാരായ അഡ്വ. സണ്ണി ജോസഫ്, റോജി എം. ജോണ്‍, മുന്‍ എം.എല്‍.എ സി. മോയിന്‍കുട്ടി, കല്‍പ്പറ്റ മണ്ഡലത്തില്‍ എം.എല്‍.എമാരായ കെ.സി ജോസഫ്, വി.ഡി സതീശന്‍, മുന്‍ എം.എല്‍.എമാരായ ജോസഫ് വാഴക്കന്‍, എ.പി അബ്ദുല്ലക്കുട്ടി, മാനന്തവാടി മണ്ഡലത്തില്‍ എം.എല്‍.എമാരായ തിരുവഞ്ചൂര്‍ രാധാകൃഷ്ണന്‍, അനൂപ് ജേക്കബ്, കോഴിക്കോട് ഡി.സി.സി പ്രസിഡന്റ് ടി. സിദ്ദീഖ്, മഹിളാ കോണ്‍ഗ്രസ് ദേശീയ സെക്രട്ടറി ഫാത്തിമ റോഷ്‌ന എന്നിവര്‍ രാഹുല്‍ ഗാന്ധിക്ക് വേണ്ടി പ്രചാരണം നടത്തും.
പഞ്ചാബ് മന്ത്രിയും മുന്‍ ക്രിക്കറ്റ് താരവുമായ നവജ്യോത് സിങ് സിദ്ദു 15ന് മണ്ഡലത്തില്‍ വിവിധ പ്രചാരണ പരിപാടികളില്‍ പങ്കെടുക്കും. തുടര്‍ന്നുള്ള ദിവസങ്ങളില്‍ നടക്കുന്ന വിവിധ തെരഞ്ഞെടുപ്പ് യോഗങ്ങളില്‍ ദേശീയ, സംസ്ഥാന നേതാക്കള്‍ പങ്കെടുക്കും.
സംസ്ഥാന നേതാക്കള്‍ക്ക് പുറമേ ദേശീയ നേതാക്കളായ പ്രിയങ്ക ഗാന്ധി, എ.കെ ആന്റണി, ഗുലാം നബി ആസാദ്, സച്ചിന്‍ പൈലറ്റ്, ജ്യോതിരാദിത്യ സിന്ധ്യ, ഖുശ്ബു എന്നിവരും വിവിധ മണ്ഡലങ്ങളില്‍ പ്രചാരണത്തിനെത്തും. 16, 17 തിയതികളില്‍ രാഹുല്‍ ഗാന്ധിയും എത്തും. വാര്‍ത്താസമ്മേളനത്തില്‍ സജീവ് ജോസഫ്, എന്‍. സുബ്രഹ്മണ്യന്‍, സി.പി ചെറിയമുഹമ്മദ് പങ്കെടുത്തു.