നെടുങ്കണ്ടം: വില്‍പ്പനക്കെത്തിച്ച കഞ്ചാവുമായി വൃദ്ധന്‍ പിടിയില്‍. ഏറണാകുളം വൈപ്പിന്‍ കാട്ടുവളപ്പില്‍ ഷെരീഫ് (60) ആണ് എക്‌സൈസിന്റെ പിടിയിലായത്.
ഇയാളില്‍ നിന്ന് 140 ഗ്രാം കഞ്ചാവ് എക്‌സൈസ് സംഘം കണ്ടെത്തി. കമ്പംമെട്ട് ചെക്‌പോസ്റ്റില്‍ ബസിറങ്ങിയശേഷം നെടുങ്കണ്ടം ഭാഗത്തേക്ക് നടന്നുവരുന്നതിനിടെ സംശയം തോന്നി എക്‌സൈസ് സംഘം നടത്തിയ ദേഹപരിശോധനയിലാണ് പ്രതി വലയിലായത്.
അടിവസ്ത്രത്തിലൊളിപ്പിച്ച നിലയിലാണ് കഞ്ചാവ് കണ്ടെത്തിയത്. ഏറണാകുളത്തെ മാര്‍ക്കറ്റില്‍ വില്‍ക്കാന്‍ കൊണ്ടുപോയ കഞ്ചാവാണിതെന്ന് എക്‌സൈസ് സംഘം അറിയിച്ചു. പ്രതി കമ്പത്തു നിന്ന് 1500 രൂപ മുടക്കിയാണ് കഞ്ചാവ് വാങ്ങിയത്. എറണാകുളത്ത് പൊതിയൊന്നിനു 500 രൂപ നിരക്കില്‍ വിദ്യാര്‍ഥികള്‍ ഉള്‍പ്പടെയുള്ളവര്‍ക്കാണ് വില്‍പ്പന നടത്തിയിരുന്നത്. പ്രതിയെ കോടതിയില്‍ ഹാജരാക്കി.