കോഴിക്കോട്: മെഡിക്കല്‍ കോളജ് മെന്‍സ് ഹോസ്റ്റലിന്റെ പരിസരം മാലിന്യം നിറഞ്ഞ നിലയിലായി. ഒന്നാം ബ്ലോക്ക് ഹോസ്റ്റലിന്റെ പ്രവേശന കവാടത്തില്‍ ഭക്ഷണാവശിഷ്ടങ്ങളും ഫാസ്റ്റ് ഫുഡ് കവറുകളും നിറഞ്ഞ നിലയിലാണെങ്കില്‍ മൂന്നാംബ്ലോക്കിനു സമീപം പ്ലാസ്റ്റിക് മാലിന്യങ്ങളും ഇലക്ട്രോണിക് മാലിന്യങ്ങളും കൂട്ടിയിട്ട നിലയിലാണ്.
നാലാം ബ്ലോക്ക് മെന്‍സ് ഹോസ്റ്റലിന്റെ ഭിത്തിയില്‍ വള്ളിപ്പടര്‍പ്പുകളും കുറ്റിച്ചെടികളും വളര്‍ന്നുപൊങ്ങിയ അവസ്ഥയിലാണ്. ഇതിലൂടെ പാമ്പ് ഉള്‍പ്പെടെയുള്ള ജീവികള്‍ കയറിവന്നിട്ടുണ്ടെന്നും ഭയപ്പാടോടുകൂടിയാണ് മുറികളില്‍ താമസിക്കുന്നതെന്നും വിദ്യാര്‍ഥികള്‍ പറയുന്നു. അറ്റകുറ്റപണികള്‍ നടത്തുമ്പോഴും ചായംപൂശുന്നവേളയിലുമല്ലാതെ ഇവ നീക്കം ചെയ്യാനാളില്ലാത്ത അവസ്ഥയാണ്. മൂന്നുവര്‍ഷം മുന്‍പ് ലേഡീസ് ഹോസ്റ്റലിനു സമീപത്ത് സാമൂഹ്യദ്രോഹികളുടെ വിളയാട്ടമുണ്ടായതിനെ തുടര്‍ന്ന് അടിക്കാടുകള്‍ വെട്ടിമാറ്റിയിരുന്നു. ഹോസ്റ്റലുകളിലേക്ക് വരുന്ന വഴിയില്‍ ആവശ്യത്തിന് വെളിച്ചമില്ലെന്നും രാത്രികാലങ്ങളില്‍ തെരുവ്‌നായ ശല്യം രൂക്ഷമാണെന്നും വിദ്യാര്‍ഥികള്‍ പരാതിപ്പെടുന്നു.