തിരുവനന്തപുരം: പ്രസ്‌ക്ലബിന്റെ ആഭിമുഖ്യത്തില്‍ നടക്കുന്ന കനകോത്സവത്തില്‍ സന്ദര്‍ശകരുടെ തിരക്കേറുന്നു. ഇന്ന് വൈകിട്ട് ആറിന് കമ്പളം ഒരുക്കുന്ന മ്യൂസിക് ബാന്‍ഡും തുടര്‍ന്ന് ഏഴു മുതല്‍ മജീഷ്യന്‍ ഗോപിനാഥ് മുതുകാട് ഒരുക്കുന്ന മാജിക് നൈറ്റും അരങ്ങേറും.
ശീതീകരിച്ച ഇരുനൂറോളം സ്റ്റാളുകള്‍ സന്ദര്‍ശിക്കുന്നതിനും വൈകുന്നേരങ്ങളിലെ കലാപരിപാടികള്‍ ആസ്വദിക്കുന്നതിനുമായി ആയിരക്കണക്കിനാളുകളാണെത്തുന്നത്. അമ്യൂസ്‌മെന്റ് പാര്‍ക്കുകളും വേറിട്ട അനുഭവമാണ് കുട്ടികള്‍ക്ക് നല്‍കുന്നത്.
ഇന്ത്യന്‍ സൈന്യത്തിന്റെ കരുത്തു വിളിച്ചോതിക്കൊണ്ട് കരസേനയുടെയും നാവികസേനയുടെയും വ്യോമസേനയുടെയും സ്റ്റാളുകള്‍, കേരള പൊലിസ് സൈബര്‍ ഡോമിന്റെ സ്റ്റാള്‍ എന്നിവ കൗതുകവും വിജ്ഞാനവും പകര്‍ന്നു നല്‍കുന്നു. മലയാള പത്രമാധ്യമങ്ങളുടെ ചരിത്രം പറയുന്ന മാധ്യമ ചരിത്ര പ്രദര്‍ശനവും ഏറെ ശ്രദ്ധേയമാണ്. വാര്‍ത്താ വിനിമയ സംവിധാനങ്ങളെക്കുറിച്ചു വിശദമാക്കുന്ന ബി.എസ്.എന്‍.എല്ലിന്റെ സ്റ്റാള്‍ മുതല്‍ മാധ്യമ ചരിത്രം വിശദമാക്കുന്ന കേരള മീഡിയ അക്കാദമിയുടെ സ്റ്റാള്‍വരെ കുട്ടികള്‍ക്കും മുതിര്‍ന്നവര്‍ക്കും കൗതുകം പകര്‍ന്നു നല്‍കുന്നു. ചക്ക, വാഴ, മാമ്പഴ മഹോത്സവം, പക്ഷി, മൃഗ, അലങ്കാര മത്സ്യപ്രദര്‍ശനം, മെഡിക്കല്‍ എക്‌സ്‌പോ, ഭക്ഷ്യമേള, പായസമേള, എന്നിങ്ങനെ എണ്ണിയാലൊടുങ്ങാത്ത പരിപാടികളാണ് കനകോത്സവത്തിന്റെ ഭാഗമായി സംഘടിപ്പിച്ചിരിക്കുന്നത്. തിരുവനന്തപുരത്ത് പ്രവര്‍ത്തിക്കുന്ന സന്നദ്ധ സംഘടനയായ സിസ, തിരുവനന്തപുരം കോര്‍പറേഷന്‍ എന്നിവയുടെ സഹകരണത്തോടെയാണ് പ്രസ് ക്ലബ് കനകോത്സവം സംഘടിപ്പിക്കുന്നത്.