ആലപ്പുഴ: കൊവിഡ് വ്യാപനത്തിനൊപ്പം മഴക്കെടുതികളും വര്‍ധിച്ചതോടെ പലയിടത്തും ജനജീവിതം ദുസഹമായി. രണ്ട് പ്രളയം നേരിട്ട കുട്ടനാട് ഉള്‍പ്പെടെ ആലപ്പുഴ ജില്ലയിലെ കുടുതല്‍ മേഖലയും വെള്ളപ്പൊക്ക ദുരിതത്തിലായി. ഒപ്പം തീരദേശം കടലാക്രമണ ഭീഷണിയും നേരിടുകയാണ്. കൊവിഡ് സ്ഥിരീകരിച്ചവരുടെ എണ്ണത്തില്‍ കുറവുണ്ടായെങ്കിലും സമ്പര്‍ക്ക വ്യാപനതോത് കൂടുതലാണ്.

രോഗം സ്ഥിരീകരിച്ച 38 പേരില്‍ രണ്ടുപേര്‍ ഒഴികെ എല്ലാവര്‍ക്കും സമ്പര്‍ക്കത്തിലൂടെയാണ് രോഗം പടര്‍ന്നിരിക്കുന്നത്. കഴിഞ്ഞ ദിവസം ചെയ്ത നിലക്കാത്ത മഴയും കാറ്റും കൊവിഡ് പ്രതിരോധപ്രവര്‍ത്തനം കൂടുതല്‍ ദുഷ്‌കരമാക്കി. പ്രളയസാധ്യത മുന്നില്‍ക്കണ്ട് ജില്ലാ ഭരണകൂടം ദുരിതാശ്വാസ ക്യാംപുകള്‍ക്കായി 412 കെട്ടിടങ്ങള്‍ കണ്ടെത്തിയിട്ടുണ്ട്. കൊവിഡ് വ്യാപനത്തെ തുടര്‍ന്ന് തീരദേശത്ത് മത്സ്യബന്ധനത്തിനും മത്സ്യവില്‍പനയ്ക്കും ഏര്‍പ്പെടുത്തിയ നിരോധനം ഓഗസ്റ്റ് അഞ്ചുവരെ ജില്ലാ കലക്ടര്‍ ദീര്‍ഘിപ്പിച്ചിട്ടുണ്ട്.

ചൊവ്വാഴ്ച രാത്രി തുടങ്ങിയ തോരാമഴയില്‍ കൊച്ചി നഗരവും വെള്ളത്തിനടിയിലായി. പ്രധാന റോഡുകളും മെട്രോ സ്‌റ്റേഷനുകളും വെള്ളത്തില്‍ മുങ്ങി.
എം.ജി റോഡ്, കടവന്ത്ര റോഡ്, കലൂര്‍, പാലാരിവട്ടം, പനമ്പള്ളി നഗര്‍ തുടങ്ങിയ ഇടങ്ങളില്‍ ഗതാഗതം മണിക്കൂറുകളോളം തടസപ്പെട്ടു.
ആലുവ, പറവൂര്‍, നെടുമ്പാശ്ശേരി എന്നിവിടങ്ങളില്‍ വീടുകളില്‍ വെള്ളം കയറി. പി.ആന്‍ഡ് ടി, ഉദയാ കോളനികള്‍, പെരുമാനൂര്‍ കോളനി എന്നിവിടങ്ങളില്‍ വെള്ളക്കെട്ടുണ്ടായി. മണിക്കൂറുകളോളം വൈദ്യുതി മുടങ്ങി. രണ്ടു ക്യാംപുകള്‍ തുറന്നു. 55 പേരെ മാറ്റിപാര്‍പ്പിച്ചു.