കൊണ്ടോട്ടി: കരിപ്പൂര്‍ വിമാനത്താവളം വഴി അനധികൃതമായി കടത്താന്‍ ശ്രമിച്ച രണ്ട്കിലോയോളം സ്വര്‍ണം എയര്‍ കസ്റ്റംസ് ഇന്റലിജന്‍സ് വിഭാഗം പിടികൂടി. ആഭരണങ്ങളായും പെന്‍സില്‍ പെട്ടിയിലും, സംയുക്തമായും നാലു സ്ത്രീകള്‍ ഉള്‍പ്പെടെ ഏഴ്‌പേര്‍ അനധികൃതമായി കടത്തിയ 65 ലക്ഷം വിലവരുന്ന 1956 ഗ്രാം സ്വര്‍ണമാണ് പിടിച്ചെടുത്തത്. സ്‌പൈസ് ജെറ്റിന്റെ ദുബൈ വിമാനത്തിലെത്തിയ കോഴിക്കോട് സ്വദേശിനികളായ ഫാത്തിമ ഇര്‍ഫാന, ആയിഷ, ആമിന സുഹാന, സാഹിദ എന്നിവര്‍ മാല രൂപത്തില്‍ ശരീരത്തില്‍ ധരിച്ച് കടത്താന്‍ ശ്രമിച്ച സ്വര്‍ണമാണ് കണ്ടെടുത്തത്. ഇവരില്‍ നിന്ന് 191, 189, 173, 173 ഗ്രാം സ്വര്‍ണം വീതമാണ് പിടിച്ചെടുത്തത്.
മലപ്പുറം മങ്കട സ്വദേശി തെരുവില്‍ രാജന്‍ (32) കളര്‍ പെന്‍സില്‍ പെട്ടികള്‍ക്കകത്ത് ഒളിപ്പിച്ച് കടത്താന്‍ ശ്രമിച്ച 430 ഗ്രാം സ്വര്‍ണവും കസ്റ്റംസ് പിടിച്ചെടുത്തു. മറ്റൊരു സംഭവത്തില്‍ കസ്റ്റംസ് പ്രിവന്റീവ് വിഭാഗം രണ്ട് പേരില്‍ നിന്നായി 800 ഗ്രാം സ്വര്‍ണം പിടിച്ചെടുത്തു. കൊണ്ടോട്ടി നെടിയിരുപ്പ് മുസ്‌ല്യാരങ്ങാടി കലങ്ങാടന്‍ ജാബിര്‍ (30), മലപ്പുറം കാവനൂര്‍ പള്ളിയാളി പൂക്കോടന്‍ നാരായണന്‍ (40) എന്നിവരില്‍ നിന്നാണ് 1030 ഗ്രാം സ്വര്‍ണ സംയുക്തം പിടിച്ചെടുത്തത്.