റിയാദ്: സഊദിക്ക് നേരെ യമനിലെ ഹൂതികൾ തൊടുത്ത് വിട്ട ആയുധ ഡ്രോൺ തകർത്തതായി അറബ് സഖ്യ സേന അറിയിച്ചു. യമനിലെ ഇറാൻ അനുകൂല വിമതരായ ഹൂതികളാണ് സ്‌ഫോടക വസ്തുക്കൾ നിറച്ച ഡ്രോണുകൾ സഊദിക്ക് നേരെ തൊടുത്തു വിട്ടത്. ഹൂതി നിയന്ത്രണത്തിലുള്ള ചെങ്കടൽ തീരത്തെ ഹുദൈദ മേഖലയിൽ നിന്നുമാണ് സഊദിയെ ലക്ഷ്യമാക്കി ആയുധ ഡ്രോൺ സഊദിക്ക് നേരെ വിക്ഷേപിച്ചതെന്ന് സഊദിയുടെ നേതൃത്വത്തിലുള്ള അറബ് സഖ്യ സേന അറിയിച്ചു.

     എന്നാൽ, ഏത് ഭാഗത് വെച്ചാണ് ഡ്രോൺ തകർത്തതെന്ന് വ്യക്തമല്ല. അതേസമയം, സംഭവത്തെ കുറിച്ച് ഹൂതികൾ ഇത് വരെ പ്രതികരിച്ചിട്ടില്ലെന്ന് റോയിട്ടേഴ്‌സ് റിപ്പോർട്ട് ചെയ്‌തു. സഊദി അതിർത്തിയിലെ സഅദയിൽ വ്യാഴാഴ്ച്ച രാവിലെ സഊദി നേതൃത്വത്തിലുള്ള അറബ് സഖ്യ സേന വ്യോമാക്രമണം നടത്തിയതായി ഹൂതി നിയന്ത്രണത്തിലുള്ള അൽ മസീറ ടെലിവിഷൻ റിപ്പോർട്ട് ചെയ്‌തു.