ഒറ്റപ്പാലം: ജൂണ്‍ 27ന് ലക്കിടി മംഗലത്തുവച്ച് നടന്ന അപകടത്തില്‍ സഹോദരങ്ങള്‍ മരിച്ചത് എതിരെ വന്ന ലോറിയിടിച്ചാണെന്ന് പൊലിസ് പറഞ്ഞു.
സി.സി ടി.വി ദൃശ്യങ്ങളിലൂടെ തിരിച്ചറിഞ്ഞ കൊഴിഞ്ഞാമ്പാറ നെയ്യ്തല സ്വദേശിയുടെ ലോറി പൊലിസ് കസ്റ്റഡിയിലെടുത്തു. ഡ്രൈവര്‍ ഡിന്‍ഡിഗല്‍ സനാര്‍പട്ടി വില്ലേജിലെ കെ.കുറുംബപ്പട്ടി ടി രാസു(48)വിനെ അറസ്റ്റ് ചെയ്യുകയും ചെയ്തു. പൂര്‍ണമായും സി.സി.ടി.വി ദൃശ്യങ്ങളുടെ സഹായത്തോടെയാണ് വാഹനത്തേയും ഡ്രൈവറെയും പൊലിസ് കണ്ടെത്തിയത്.
മരിച്ച സഹോദരങ്ങള്‍ സഞ്ചരിച്ചിരുന്ന വഴിയിലെ 78 ക്യാമറകളുടെ ദൃശ്യങ്ങള്‍ പരിശോധിച്ചിരുന്നു. മങ്കര മഞ്ഞക്കര മേലേതില്‍വീട്ടില്‍ വിനോദ്(42), സഹോദരന്‍ വിജേഷ് (36) എന്നിവരാണ് ലക്കിടി മംഗലത്ത് വെച്ച് അപകടത്തില്‍ മരിച്ചിരുന്നത്. സൈബര്‍ സെല്ലിന്റെയും പാലക്കാട് എസ്.പിയുടെ പ്രത്യേക സ്‌ക്വാഡിന്റെയും പ്രദേശിക വ്യാപാരികളുടെയും സഹായവും പ്രതിയെ പിടികൂടാന്‍ സഹായകരമായി. ഒറ്റപ്പാലം സി.ഐ പി അബ്ദുള്‍ മുനീറിനൊപ്പം ട്രാഫിക് എസ്.ഐ ടി സുരേന്ദ്രന്‍, എ.എ.ഐ ബിജേഷ്, ജയകുമാര്‍, വി രവികുമാര്‍, കെ.സി പ്രദീപ് കുമാര്‍, സലീം, മഹേശ്വരി അന്വേഷണ സംഘത്തിലുണ്ടായിരുന്നത്.