കുറ്റ്യാടി: വേളം പൂമുഖത്ത് മുസ്‌ലിം ലീഗ് പ്രവര്‍ത്തകരും പൊലിസും തമ്മിലുണ്ടായ സംഘര്‍ഷത്തില്‍ മൂന്നു പൊലിസുകാര്‍ക്ക് പരുക്ക്. ടി.ആര്‍ രഞ്ജിത്ത് (30 ), പി. വിപിന്‍ (26), സ്‌പെഷല്‍ ബ്രാഞ്ച് ഓഫിസര്‍ കെ. സുരേഷ് (40) എന്നിവരെയാണ് സാരമായ പരുക്കുകളോടെ കുറ്റ്യാടി താലൂക്ക് ആശുപത്രിയില്‍ പ്രവേശിപ്പിച്ചത്.
ഇന്നലെ വൈകിട്ട് 5.30ഓടെയാണ് സംഭവം. എസ്.ഡി.പി.ഐ കുറ്റ്യാടി മണ്ഡലം വാഹന പ്രചാരണജാഥ തടയാന്‍ തടിച്ചുകൂടിയ ലീഗ് പ്രവര്‍ത്തകരെ പിരിച്ചുവിടാനുള്ള ശ്രമത്തിനിടയിലാണ് സംഘര്‍ഷമുണ്ടായത്. ജാഥ തടയാനെത്തിയ ചില ലീഗ് പ്രവര്‍ത്തകരെ പൊലിസ് കസ്റ്റഡിയിലെടുക്കുകയും വാനില്‍ കയറ്റുകയും ചെയ്തിരുന്നു. കാരണമില്ലാതെയാണ് ഇവരെ പിടികൂടിയതെന്നും അതിനാല്‍ വിട്ടയക്കണമെന്നും ലീഗ് പ്രവര്‍ത്തകര്‍ ആവശ്യപ്പെട്ടിട്ടും പൊലിസ് വയങ്ങിയില്ല. തുടര്‍ന്നാണ് സംഘര്‍ഷം ഉടലെടുത്തത്. ലീഗ് പ്രവര്‍ത്തകര്‍ നടത്തിയ കല്ലേറില്‍ പൊലിസുകാര്‍ക്ക് പരുക്കേറ്റു. പൊലിസ് വാഹനം തകര്‍ക്കുകയും ചെയ്തു. കുറ്റ്യാടി സി.ഐയുടെ ജീപ്പ് ഒരു സംഘം ആളുകള്‍ വയലിലേക്ക് മറിച്ചിടുകയായിരുന്നു. സ്ഥലത്ത് വന്‍ പൊലിസ് സംഘം ക്യാംപ് ചെയ്യുന്നുണ്ട്.
എം.എസ്.എഫ് പ്രവര്‍ത്തകന്‍ നസ്‌റുദ്ദീനെ എസ്.ഡി.പി.ഐ പ്രവര്‍ത്തകര്‍ കൊല ചെയ്തതിനെ തുടര്‍ന്ന് ഈ മേഖലയില്‍ ലീഗ്-എസ്.ഡി.പി.ഐ സംഘര്‍ഷം പലപ്പോഴായി നടക്കുന്നുണ്ട്. മേഖലയില്‍ എസ്.ഡി.പി.ഐയെ പ്രവര്‍ത്തിക്കാന്‍ അനുവദിക്കില്ലെന്നാണ് ലീഗിന്റെ നിലപാട്. ഇതിനെ വെല്ലുവിളിച്ച് എസ്.ഡി.പി.ഐ കുറ്റ്യാടി മണ്ഡലം നടത്തിയ വാഹന പ്രചാരണജാഥ സംഘര്‍ഷത്തിന് വഴിവയ്ക്കുകയായിരുന്നു.