കുന്നംകുളം: നീണ്ടനാളത്തെ കാത്തിരിപ്പിനൊടുവില്‍ ലക്ഷംവീട് കോളനിയിലെ ചാക്കത്ത്പറമ്പില്‍ കാളിയുടെ സ്വപ്നം പൂവണിയുന്നു. കുട്ടികളുമായി കളിക്കാനും അവരുടെ പാല്‍പുഞ്ചിരി കാണാനുമായി തന്റെ വീടും സ്ഥലവും അങ്കണവാടി നിര്‍മാണത്തിന് നല്‍കിയ നാട്ടുകാരുടെ കാളിയമ്മായിയുടെ സ്ഥലത്ത് നിര്‍മിച്ച അങ്കണവാടി ഇന്ന് മൂന്നിന് പഞ്ചായത്ത് പ്രസിഡന്റ് സി.കെ സദാനന്ദന്‍ ഉദ്ഘാടനം ചെയ്യും.
വൈസ് പ്രസിഡന്റ് സുജിനി ബാബുജി അധ്യക്ഷനാകും. ജില്ല പഞ്ചായത്തംഗം കെ ജയശങ്കര്‍ കാളിയമ്മായിയെ ആദരിക്കും.
ആരോരുമില്ലാത്ത കാളിയമ്മായി മൂന്ന് വര്‍ഷം മുന്‍പാണ് തന്റെ വീടും സ്ഥലവും കാലശേഷം 45ാം നമ്പര്‍  അങ്കണവാടിയുടെ നിര്‍മാണത്തിനായി പഞ്ചായത്ത് സെക്രട്ടറിയുടെ പേരില്‍ എഴുതിനല്‍കിയത്.
ഇതില്‍ വീടിരിക്കുന്ന ഭാഗം ഒഴിവാക്കി നാലുസെന്റില്‍ അങ്കണവാടി നിര്‍മിക്കുകയായിരുന്നു.
പഞ്ചായത്തിന്റെ 2016-17 പദ്ധതി പ്രകാരം എട്ടു ലക്ഷം ചെലവിട്ടാണ് അങ്കണവാടി നിര്‍മിച്ചത്. പഞ്ചായത്തംഗം അനിത മുരളി, മുന്‍ പഞ്ചായത്തംഗം എം.എ അബ്ദുല്‍ റഷീദ്  എന്നിവരുടെ നേതൃത്വത്തില്‍ അങ്കണവാടിയുടെ നിര്‍മാണം പൂര്‍ത്തിയാക്കുകയായിരുന്നു.