കാബൂള്‍: അഫ്ഗാനിസ്ഥാന്‍ തലസ്ഥാനമായ കാബൂളില്‍ മാര്‍ച്ച് 25ന് ഒരു ഗുരുദ്വാരയില്‍ ഉണ്ടായ ചാവേര്‍ ആക്രമണത്തില്‍ പങ്കെടുത്ത മൂന്ന് പേരില്‍ ഇന്ത്യക്കാരനല്ലെന്ന് ഡി.എന്‍.എ പരിശോധനാ ഫലം. ചീാവേര്‍ അഫ്ഗാനി തന്നെയാണെന്നാണ് പരിശോധനയില്‍ കണ്ടെത്തിയതെന്ന് ദ പ്രിന്റ് റിപ്പോര്‍ട്ട് ചെയ്യുന്നു. കാസര്‍ഗോട് നിന്നുള്ള മലയാളിയായ കല്ലുകെട്ടി ഇജാസാണ് ഒരു ചാവേര്‍ എന്ന് ഇംഗ്ലീഷ് മാധ്യമങ്ങള്‍ നേരത്തെ റിപ്പോര്‍ട്ട് ചെയ്തിരുന്നു.

ചാവേറായ വ്യക്തിയുടെ ഡി.എന്‍.എ അഫ്ഗാന്‍ സുരക്ഷാ ഉദ്യോഗസ്ഥര്‍ പരിശോധിച്ചിരുന്നു. പരിശോധനയില്‍ 21കാരനായ മുഹമ്മദ് മുഹ്സിന്‍ എന്ന അബു ഖാലിദ് അല്‍ഹിന്ദിയെന്ന അഫ്ഗാന്‍ പൗരനാണ് ഇതെന്നും ഇന്ത്യക്കാരനല്ലെന്ന് തെളിയുകയുമായിരുന്നു. ചാവേര്‍ ഇന്ത്യന്‍ സ്വദേശിയല്ലെന്നും അഫ്ഗാന്‍ പൗരനാണെന്നുമുള്ള റിപ്പോര്‍ട്ട് എന്‍.ഐ.എയ്ക്ക് കൈമാറിയതായി സുരക്ഷാ ഉദ്യോഗസ്ഥരുമായി ബന്ധപ്പെട്ട വൃത്തങ്ങള്‍ പറഞ്ഞതായി പ്രിന്റ് റിപ്പോര്‍ട്ടിലുണ്ട്.

മാര്‍ച്ച് 25നാണ് ഗുരുദ്വാരയില്‍ പ്രാര്‍ത്ഥന നടക്കുന്നതിനിടെ ചാവേറാക്രമണം നടന്നത്. ആക്രമണത്തില്‍ 2 പേര്‍ കൊല്ലപ്പെട്ടു. അഫ്ഗാനിസ്ഥാനിലെ ഇസ്ലാമിക് ഖോറസാന്‍ പ്രൊവിന്‍സ് എന്ന തീവ്രവാദ സംഘടന ആക്രമണത്തിന്റെ ഉത്തരവാദിത്വം ഏറ്റെടുത്തിരുന്നു. ഐസിസിനോട് അനുഭാവം പുലര്‍ത്തുന്ന സംഘടനയാണിതെന്നാണ് പറയുന്നത്.