തൃശൂര്‍: അപകടത്തില്‍ മരിച്ച കോടനാട് എസ്‌റ്റേറ്റ് കൊലപാതക കേസ് പ്രതിയുടെ ഭാര്യയുടേയും മകളുടേയും മൃതദേഹത്തില്‍ കണ്ട മുറിവുകളില്‍ അസ്വഭാവികതയില്ലെന്ന് പോസ്റ്റ്‌മോര്‍ട്ടം നടത്തിയ ഡോക്ടര്‍മാരുടെ വിലയിരുത്തല്‍.

പരുക്കുകള്‍ അപകടം മൂലം ഉണ്ടായതെന്നാണ് പരിശോധന റിപ്പോര്‍ട്ട്. കഴുത്തിലെ മുറിവുകള്‍ ചില്ല് തറച്ച് ഉണ്ടായതെന്നും പോസ്റ്റ്‌മോര്‍ട്ടം പരിശോധന ഫലം.

കോടനാട് കൊലപാതക കേസിലെ പ്രതിയായ സയനും കുടുംബവും സഞ്ചരിച്ചിരുന്ന കാര്‍ ശനിയാഴ്ചയാണ് പാലക്കാട് വച്ച് നിര്‍ത്തിയിട്ടിരുന്ന ചരക്ക് ലോറിയില്‍ ഇടിക്കുന്നത്. അപകടത്തില്‍ സയന്റെ ഭാര്യയും മകളും കൊല്ലപ്പെട്ടിരുന്നു. ഗുരുതരമായി പരുക്കേറ്റ സയന്‍ ചികിത്സയിലാണ്. വിനുപ്രിയയുടെയും നീതുവിന്റേയും കഴുത്തില്‍ കണ്ട മുറിവ് മരണത്തിന് മുമ്പ് സംഭവിച്ചതായിരിക്കുമെന്ന് സംശയം ഉയര്‍ന്നിരുന്നു.