കോട്ടയം: പഴയ അറവുശാല പ്രവര്‍ത്തനം നിലയ്ക്കുകയും ആധുനിക രീതിയിലുള്ള പുതിയതിന്റെ ് നിര്‍മാണം പൂര്‍ത്തീകരിക്കുകയും ചെയ്യാതെ വന്നതോടെ നഗരത്തില്‍ അംഗീകൃത അറവുശാലകളില്ലാതായി. ഇതോടെ നഗരത്തിലെ ഇറച്ചി വിപണി പ്രതിസന്ധിയിലായി. ഈസ്റ്ററും റമദാനും അടുത്തിരിക്കെ മാട്ടിറച്ചിയുടെ ലഭ്യതക്കുറവ് ബുദ്ധിമുട്ടുണ്ടാക്കും. മാലിന്യ സംസ്‌കരണത്തിലെ അപാകതകള്‍ മൂലമാണ് പഴയ അറവുശാല അടച്ചുപൂട്ടിയത്. അതേസമയം 2008ല്‍ നിര്‍മ്മാണം ആരംഭിച്ച പുതിയ അറവുശാല ഇനിയും പ്രവര്‍ത്തനസജ്ജമായിട്ടില്ല.
മലീനീകരണ നിയന്ത്രണ ബോര്‍ഡ്, ശുചിത്വ മിഷന്‍ എന്നിവയുടെ നിര്‍ദ്ദേശത്തെ തുടര്‍ന്നാണ് പഴയ അറവുശാലയ്ക്ക് പൂട്ട് വീണത്. ഇതോടെ കോട്ടയം നഗരത്തില്‍ അംഗീകൃത അറവുശാല ഇല്ലാതായി. ഡോക്ടര്‍ സര്‍ട്ടിഫൈ ചെയ്ത ഉരുക്കളെ മാത്രമേ കശാപ്പ് ചെയ്യാന്‍ പാടുള്ളൂ എന്നതിനാല്‍ വ്യാപാരികളും പ്രതിസന്ധിയിലായി. പഴയ അറവുശാല അടച്ചു പൂട്ടിയതിനൊപ്പം ഇവിടെ വ്യാപാരം നടത്തിയിരുന്നവര്‍ക്കും ടെന്‍ഡര്‍ പുതുക്കി ലഭിച്ചില്ല.
കോടിമത പച്ചക്കറി ചന്തയ്ക്ക് സമീപം പുതിയ അറവുശാലയുടെ നിര്‍മ്മാണം 2008ല്‍ ആരംഭിച്ചതാണ്.
കേന്ദ്ര പദ്ധതി പ്രകാരം ഒരു കോടി രൂപ വകയിരുത്തിയിരുന്നെ്ങ്കിലും നിര്‍മാണം നിശ്ചിത സമയത്തിനുള്ളില്‍ പൂര്‍ത്തീകരിക്കാനായില്ല. പിന്നീട് 2 വര്‍ഷത്തിന് ശേഷമാണ് കെട്ടിടം പൂര്‍ത്തീകരിച്ചത്. എന്നാല്‍ ഇവിടേക്ക് വേണ്ട യന്ത്ര സാമഗ്രികള്‍ സ്ഥാപിക്കാത്തതിനാല്‍ ഇവിടെ കശാപ്പ് ആരംഭിക്കാനാവിവില്ല. യന്ത്ര സാമഗ്രികള്‍ക്കായി 70 ലക്ഷം രൂപ വകയിരുത്തിയിട്ടുണ്ടെങ്കിലും അവ ബാംഗ്ലൂരില്‍ നിന്നും എത്തിച്ച് സ്ഥാപിക്കാന്‍ ഇനിയും സമയമെടുക്കും. നിലവില്‍ പത്തോളം അനധികൃത കശാപ്പുശാലകളാണ് നഗരത്തില്‍ പ്രവര്‍ത്തിക്കുന്നത്. വ്യാപാരികള്‍ ഇവിടെ നിന്നും മാംസം വാങ്ങിയാണ് വില്‍പ്പന നടത്തുന്നത്. അറവുശാല ഉടന്‍ തുറന്ന് ഗുണനിലവാരമുള്ള മാംസത്തിന്റെ ലഭ്യത ഉറപ്പാക്കാന്‍ നഗരസഭ നടപടി സ്വീകരിക്കണമെന്ന ആവശ്യം ശക്തമായി.