തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്ക് കൃത്യസമയത്ത് തെരഞ്ഞെടുപ്പ് നടത്തുന്നതില്‍ എതിര്‍പ്പില്ലെന്നും യു.ഡി.എഫ് പൂര്‍ണ സജ്ജമെന്നും പ്രതിപക്ഷ നേതാവ് രമേശ് ചെന്നിത്തല. തദ്ദേശ തെരഞ്ഞെടുപ്പില്‍ യു.ഡി.എഫിനൊപ്പം ജനം നില്‍ക്കും. 

തെരഞ്ഞെടുപ്പ് കമ്മിഷന്‍ തീരുമാനിക്കുന്ന സമയത്ത് തെരഞ്ഞെടുപ്പ് നടത്താമെന്നാണ് യു.ഡി.എഫ് അഭിപ്രായം. തെരഞ്ഞെടുപ്പ് മാറ്റണമെന്ന് ആവശ്യപ്പെടില്ല. പ്രോക്‌സി വോട്ട് സംബന്ധിച്ച് യു.ഡി.എഫിലെ ഘടകകക്ഷികളുമായി ചര്‍ച്ച ചെയ്ത് തീരുമാനിക്കും. തെരഞ്ഞെടുപ്പ് സംബന്ധിച്ച് എന്‍.എസ്.എസ് ഉള്‍പ്പെടെയുള്ള സംഘനകളുടെ അഭിപ്രായം പരിശോധിച്ച് തീരുമാനമെടുക്കേണ്ടത് കമ്മിഷനാണ്. കേരള കോണ്‍ഗ്രസ് ജോസ് കെ.മാണി വിഭാഗം ഇപ്പോഴും യു.ഡി.എഫിലാണ്. ഫോര്‍ട്ട് പൊലിസ് സ്റ്റേഷനില്‍ പ്രതി തൂങ്ങിമരിച്ച സംഭവത്തില്‍ അന്വേഷണം ക്രൈംബ്രാഞ്ചിനെ ഏല്‍പ്പിച്ചത് നിയമവിരുദ്ധമാണ്. ജില്ലാ ജഡ്ജിയുടെ നേതൃത്വത്തില്‍ ജ്യുഡിഷ്യല്‍ അന്വേഷണം നടത്തണമെന്നും  ചെന്നിത്തല പറഞ്ഞു.