മുംബൈ: റോയല്‍ ചലഞ്ചേഴ്‌സ് ബാംഗ്ലൂരിന്റെ നേരിയ പ്ലേയോഫ് പ്രതീക്ഷകള്‍ക്കും തിരശ്ശീല വീണു. മുംബൈ ഇന്ത്യന്‍സ് ബാംഗ്ലൂരിനെ അഞ്ച് വിക്കറ്റിന് വീഴ്ത്തി പ്ലേയോഫ് ഏതാണ്ടുറപ്പാക്കി. ആദ്യം ബാറ്റ് ചെയ്ത ബാംഗ്ലൂര്‍ 20 ഓവറില്‍ എട്ട് വിക്കറ്റ് നഷ്ടത്തില്‍ 162 റണ്‍സെടുത്തപ്പോള്‍ മുംബൈ 19.5 ഓവറില്‍ അഞ്ച് വിക്കറ്റ് നഷ്ടത്തില്‍ 165 റണ്‍സെടുത്ത് വിജയിക്കുകയായിരുന്നു. നായകന്‍ രോഹിത് ശര്‍മ 56 റണ്‍സെടുത്ത് പുറത്താകാതെ നിന്ന് വിജയ ശില്‍പ്പിയായി. ബട്‌ലര്‍ (33), നിതീഷ് റാണ (27) എന്നിവരും തിളങ്ങി.
ബാംഗ്ലൂരിനായി ഡിവില്ല്യേഴ്‌സ് (45), പവന്‍ നെഗി (35), ജാദവ് (28) എന്നിവര്‍ തിളങ്ങി. മുംബൈയ്ക്കായി മക്ലനാഗന്‍ മൂന്ന് വിക്കറ്റുകളും ക്രുനല്‍ പാണ്ഡ്യ രണ്ട് വിക്കറ്റുകളും വീഴ്ത്തി. രോഹിതാണ് കളിയിലെ കേമന്‍.