തേഞ്ഞിപ്പലം: പള്ളിക്കലില്‍ ബസുകള്‍ മിന്നല്‍ പണിമുടക്ക് നടത്തിയത് യാത്രക്കാര്‍ക്ക് ദുരിതമായി. ഇന്നലെ ഉച്ചയോടെ കൊണ്ടോട്ടി-പരുത്തിക്കോട് വഴി സര്‍വകലാശാല റൂട്ടില്‍ സര്‍വീസ് നടത്തുന്ന ബസുകളാണ് മിന്നല്‍ പണിമുടക്ക് നടത്തിയത്.
പള്ളിക്കല്‍ബസാര്‍ ബസ് സ്റ്റാന്‍ഡില്‍ പ്രവേശിക്കാത്ത ബസുകള്‍ക്കെതിരേ നിരന്തരമുള്ള യാത്രക്കാരുടെയും വിവിധ സംഘടനകളുടെയും പരാതിയുടെ അടിസ്ഥാനത്തില്‍ ഇന്നലെ പൊലിസെത്തി എല്ലാ ബസ്സുകളും സ്റ്റാന്‍ഡില്‍ കയറണമെന്ന് ബസ് ജീവനക്കാരോടാവശ്യപ്പെട്ടിരുന്നു. ഒരു ബസ് ജീവനക്കാര്‍ ഇതിനെ എതിര്‍ത്ത് പൊലിസുമായി വാക്കേറ്റമുണ്ടാവുകയും ബസ് പൊലിസ് കസ്റ്റഡിയില്‍ എടുക്കുകയും ചെയതു. ഇതോടെ ഈ റൂട്ടിലെ ബസ് ജീവനക്കാര്‍ ഇന്നലെ ഉച്ചയോടെ മിന്നല്‍ പണിമുടക്ക് നടത്തി.
തുടര്‍ന്ന് കൊണ്ടോട്ടി-പരുത്തിക്കോട് വഴി സര്‍വകലാശാല റൂട്ടില്‍ സര്‍വീസ് നടത്തുന്ന ബസുകള്‍ സമയക്കുറവ് മൂലം സ്റ്റാന്‍ഡില്‍ പ്രവേശിക്കാന്‍ കഴിയില്ല എന്നറിയിക്കുകയും ബസ്സുകള്‍ സ്റ്റാന്റില്‍ കയറില്ലെന്ന തീരുമാനത്തില്‍ ഉറച്ചു നില്‍ക്കുകയും ചെയ്തു. വൈകിട്ട് പൊലിസുമായി നടത്തിയ ചര്‍ച്ചയില്‍ സമയ പ്രശ്‌നം ബന്ധപ്പെട്ടവരുമായി ചര്‍ച്ച ചെയ്തു തീരുമാനിക്കും വരെ സ്റ്റാന്‍ഡില്‍ പ്രവേശിക്കാതെ സര്‍വീസ് നടത്തുന്നതിന് പൊലിസ് അനുമതി നല്‍കിയതിനാല്‍ പണിമുടക്ക് അവസാനിപ്പിക്കുകയായിരുന്നു.