കണ്ണൂര്‍: കേരളത്തില്‍ ഭരണമില്ലെന്നും മുഖ്യമന്ത്രി പിണറായി വിജയന്‍ ഭരിച്ച് മുടിക്കുകയാണെന്നും കെ.പി.സി.സി പ്രസിഡന്റ് എം.എം ഹസ്സന്‍. യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ് നയിക്കുന്ന യൂത്ത് മാര്‍ച്ചിന് കണ്ണൂര്‍ കാല്‍ടെക്‌സില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. സംസ്ഥാനത്ത് നടപ്പാക്കുന്ന ജനക്ഷേമ പ്രവര്‍ത്തനങ്ങളൊന്നും ജനങ്ങള്‍ക്ക് അനുഭവപ്പെടുന്നില്ല. മുതലാളിയുടെ ഭാഷയാണ് പിണറായിക്ക്. തികഞ്ഞ ഏകാധിപതിയായാണ് അദ്ദേഹം കേരളം ഭരിക്കുന്നതെന്നും ഹസ്സന്‍ പറഞ്ഞു. രാജ്യത്ത് വര്‍ഗീയത വിഷക്കാറ്റുപോലെ ആഞ്ഞുവീശുകയാണ്. വര്‍ഗീയത അരക്കെട്ടുറപ്പിക്കുമ്പോഴും ഇന്ത്യന്‍ ഭരണം ആര്‍.എസ്.എസിന്റെ റിമോര്‍ട്ട് കണ്‍ട്രോളിലാണെന്നും ഹസ്സന്‍ കൂട്ടിച്ചേര്‍ത്തു. യൂത്ത് കോണ്‍ഗ്രസ് ബ്ലോക്ക് പ്രസിഡന്റ് വി.എ ഹരി അധ്യക്ഷനായി. ഡി.സി.സി പ്രസിഡന്റ് സതീശന്‍ പാച്ചേനി, മുന്‍ കോഴിക്കോട് ഡി.സി.സി പ്രസിഡന്റ് കെ.സി അബു, വി.എസ് ജോയി, എ.പി അബ്ദുല്ലക്കുട്ടി, രാജീവന്‍ എളയാവൂര്‍, തമ്പാനൂര്‍ രവി, ചന്ദ്രന്‍ തില്ലങ്കേരി സംസാരിച്ചു.