മണ്ണഞ്ചേരി: അയല്‍പക്കത്തെ പഴയ വീടിന്റെ മുന്‍വശം പൊളിക്കുന്നതിനിടെ ബീം വീണ് ഒന്നാം ക്ലാസ് വിദ്യാര്‍ഥി മരിച്ചു. മണ്ണഞ്ചേരി പഞ്ചായത്ത് 19-ാം വാര്‍ഡ് കണ്ണാട്ടുവെളി അജി-സീമ ദമ്പതികളുടെ ഇരട്ട മക്കളില്‍ ഒരാളായ അരവിന്ദ് (ഏഴ്) ആണ് മരിച്ചത്.
മണ്ണഞ്ചേരി ക്രസന്റ് പബ്ലിക് സ്‌കൂളിലെ ഒന്നാം ക്ലാസ് വിദ്യാര്‍ഥിയാണ്. ഇന്നലെ കൊടിയന്താറ്റ് സിദ്ദിഖിന്റെ വീടിനുള്ളില്‍ മറ്റു കുട്ടികളുമായി കളിക്കുന്നതിനിടെ പുറത്ത് ശബ്ദം കേട്ട് അരവിന്ദ് ഓടിയെത്തിയപ്പോള്‍ ബീം ദേഹത്ത് വീഴുകയായിരുന്നു.
പരിക്കേറ്റ അരവിന്ദിനെ വണ്ടാനം മെഡിക്കല്‍ കോളേജ് ആശുപത്രിയിലേയ്ക്ക് കൊണ്ടുപോകും വഴി മരിച്ചു. മൃതദേഹം പോസ്റ്റുമോര്‍ട്ടത്തിന് ശേഷം ഇന്ന് ഉച്ചയ്ക്ക് വീട്ടുവളപ്പില്‍ സംസ്‌ക്കരിക്കും. സഹോദരങ്ങള്‍: ആരോമല്‍, ആദിത്യ.