തിരുവനന്തപുരം: വരള്‍ച്ച നേരിടുന്നതിന് സര്‍ക്കാര്‍ ഫലപ്രദമായ നടപടികള്‍ സ്വീകരിക്കുന്നില്ലെന്ന് ആരോപിച്ച് നിയമസഭയില്‍ പ്രതിപക്ഷത്തിന്റെ അടിയന്തരപ്രമേയം. വരള്‍ച്ച നേരിടാന്‍ സര്‍ക്കാര്‍ തുക അനുവദിച്ചിട്ടുണ്ടെങ്കിലും അതു ഫലപ്രദമായി വിനിയോഗിക്കാന്‍ നടപടികള്‍ സ്വീകരിക്കുന്നില്ലെന്ന് അടിയന്തരപ്രമേയത്തിന് അവതരണാനുമതി തേടിയ അടൂര്‍ പ്രകാശ് ആരോപിച്ചു.
വരള്‍ച്ചാ ദുരിതാശ്വാസ പ്രവര്‍ത്തനങ്ങള്‍ക്കു മേല്‍നോട്ടം വഹിക്കാന്‍ ജില്ലകളില്‍ മന്ത്രിമാര്‍ക്കു ചുമതല നല്‍കിയിട്ടുണ്ട്. എന്നാല്‍ അവര്‍ ഉത്തരവാദിത്തത്തോടെ ആ ചുമതല നിറവേറ്റുന്നുണ്ടോ എന്നു പരിശോധിക്കണമെന്നും അടൂര്‍ പ്രകാശ് പറഞ്ഞു. ഒരു മണ്ഡലത്തിന് 10 ലക്ഷം രൂപ അനുവദിച്ചത് അപര്യാപ്തമാണെന്ന് തിരുവഞ്ചൂര്‍ രാധാകൃഷ്ണന്‍ പറഞ്ഞു. വരള്‍ച്ചയെ സര്‍ക്കാര്‍ ഗൗരവത്തോടെ കാണണമെന്ന് പ്രതിപക്ഷനേതാവ് രമേശ് ചെന്നിത്തല പറഞ്ഞു.
വരള്‍ച്ച നേരിടാന്‍ സര്‍ക്കാര്‍ സാധ്യമായതെല്ലാം ചെയ്യുന്നുണ്ടെന്ന് അടൂര്‍ പ്രകാശിന് മറുപടി നല്‍കിയ മന്ത്രി ഇ. ചന്ദ്രശേഖരന്‍ പറഞ്ഞു. മന്ത്രിയുടെ മറുപടിയുടെ അടിസ്ഥാനത്തില്‍ സ്പീക്കര്‍ അടിയന്തരപ്രമേയത്തിന് അവതരണാനുമതി നിഷേധിച്ചെങ്കിലും പ്രതിപക്ഷം പ്രതിഷേധിച്ച് ഇറങ്ങിപ്പോയില്ല.