മലപ്പുറം: എസ്.എം.എഫ് സംസ്ഥാന കമ്മിറ്റി മഹല്ലുകളില്‍ നടത്തിവരുന്ന പ്രീമാരിറ്റല്‍ കോഴ്‌സ് ജില്ലയില്‍ രണ്ടാംഘട്ടമായി മുപ്പത് പഞ്ചായത്തുകളില്‍ കൂടി. ഓഗസ്റ്റ് രണ്ടാം വാരത്തില്‍ ക്ലാസുകള്‍ ആരംഭിക്കും. 16 വയസ് പ്രായമുള്ള പെണ്‍കുട്ടികള്‍ക്കും 20 വയസ് പ്രായമായ ആണ്‍കുട്ടികള്‍ക്കുമാണ് വെവ്വേറെ ബാച്ചുകളായി ക്ലാസുകള്‍ നടക്കുന്നത്. ഓഗസ്റ്റില്‍ ചീക്കോട്, ആലിപ്പറമ്പ്, പൂക്കോട്ടൂര്‍, കീഴാറ്റൂര്‍, ചേലേമ്പ്ര, തേഞ്ഞിപ്പലം എന്നീ പഞ്ചായത്തുകളിലാണ് രണ്ടാംഘട്ടത്തില്‍ കോഴ്‌സുകള്‍ തുടങ്ങുക. 27ന് ചേലേമ്പ്ര, 31 ന് തേഞ്ഞിപ്പലം, പൂക്കോട്ടൂര്‍, ഓഗസ്റ്റ് രണ്ടിന് ആലിപ്പറമ്പ്, മൂന്നിന് ചീക്കോട്, കീഴാറ്റൂര്‍ പഞ്ചായത്തുകളില്‍ ഇതിനായി നേതൃസംഗമങ്ങള്‍ വിളിച്ച് ചേര്‍ക്കും. നിലവില്‍ കോഴ്‌സ് പൂര്‍ത്തിയാക്കിയ 24 കേന്ദ്രങ്ങളില്‍ പഠിതാക്കള്‍ക്ക് സര്‍ട്ടിഫിക്കറ്റ് വിതരണം ചെയ്തു. ഇവരുടെ സംഗമം മൊറയൂരില്‍ നടത്തും. അബ്ദുല്‍ അസീസ് മുസ്‌ലിയാര്‍ അധ്യക്ഷനായി. എ.കെ ആലിപ്പറമ്പ് ഉദ്ഘാടനം ചെയ്തു. ശംസുദ്ദീന്‍ ഒഴുകൂര്‍ സംസാരിച്ചു.