തളിപ്പറമ്പ്: കഴിഞ്ഞ ദിവസം തളിപ്പറമ്പിലും പരിസരത്തുമായി നടന്ന മോഷണങ്ങളുമായി ബന്ധപ്പെട്ട് തൊരപ്പന്‍ സന്തോഷിനെ കേന്ദ്രീകരിച്ച് പൊലിസ് അന്വേഷണം ഊര്‍ജിതമാക്കി. മോഷണം നടന്ന രീതിയും മന്ന അല്‍മാസ് ബേക്കറിയിലെ സി.സി ടി.വിയില്‍ നിന്നു ലഭിച്ച ദൃശ്യങ്ങളും തൊരപ്പന്‍ സന്തോഷിലേക്കാണ് വിരല്‍ചൂണ്ടുന്നത്. ചുമര്‍ തുരന്ന് അകത്തു കടന്ന് മോഷണം നടത്തുന്നതിനാലാണ് തൊരപ്പന്‍ എന്ന പേര് വീണത്. ഒരു കടയില്‍ തുരന്നു കയറുകയും മറ്റ് കടകളുടെ പൂട്ട് പൊളിച്ച് അകത്തു കടക്കുകയുമാണ് ഇയാളുടെ രീതി. മോഷണം നടത്തിയതിനു ശേഷം കേരളത്തിനു പുറത്ത് ആര്‍ഭാട ജീവിതം നയിച്ച് പണം ധൂര്‍ത്തടിച്ച് തീര്‍ത്തതിനു ശേഷം തിരിച്ചെത്തി വീണ്ടും മോഷണം നടത്തുകയാണ് ഇയാള്‍ ചെയ്യാറ്. കവര്‍ച്ചാ കേസില്‍ പിടിയിലായി ശിക്ഷിക്കപ്പെട്ട് ജയിലിലായിരുന്ന സന്തോഷ് കഴിഞ്ഞ ആഴ്ചയാണ് പുറത്തിറങ്ങിയത്. തളിപ്പറമ്പ് പ്രിന്‍സിപ്പല്‍ എസ്.ഐ പി രാജേഷിന്റെ നേതൃത്വത്തിലാണ് അന്വേഷണം.