ന്യൂഡല്‍ഹി: കോണ്‍ഗ്രസില്‍ നേതൃമാറ്റം ആവശ്യപ്പെട്ട് കത്തെഴുതിയ നേതാക്കള്‍ക്കെതിരെ ആരോപണവുമായി രാഹുല്‍ഗാന്ധി. പാര്‍ട്ടി പ്രതിസന്ധിയിലായപ്പോള്‍ നേതൃമാറ്റം ആവശ്യപ്പെട്ടവര്‍ ബി.ജെ.പിയുമായി രഹസ്യധാരണയുണ്ടാക്കുകയാണ് ചെയ്തതെന്ന് രാഹുല്‍ കുറ്റപ്പെടുത്തി.

മധ്യപ്രദേശിലും രാജസ്ഥാനിലും കോണ്‍ഗ്രസ് പ്രതിസന്ധി നേരിടുകയും സോണിയ അസുഖബാധിതയായിരിക്കുന്ന സമയമായിട്ടും എന്തിനാണ് കത്ത് അയച്ചതെന്ന് രാഹുല്‍ ചോദിച്ചു. കത്ത് എഴുതിയവര്‍ ബി.ജെ.പിയുമായി രഹസ്യധാരണയിലുള്ളവരാണെന്നും രാഹുല്‍ ആരോപിച്ചു.

എം.പിമാരും മുന്‍ കേന്ദ്രമന്ത്രിമാരും ഉള്‍പ്പെടെ 26 ഉന്നത കോണ്‍ഗ്രസ് നേതാക്കളാണ് കത്ത് എഴുതിയത്. കോണ്‍ഗ്രസിന് മുഴുവന്‍ സമയ പ്രസിഡന്റ് വേണമെന്നായിരുന്നു കത്തിലെ ആവശ്യം.

അതേസമയം, കോണ്‍ഗ്രസ് അധ്യക്ഷസ്ഥാനം ഒഴിയുന്നതായി സോണിയാഗാന്ധി പ്രവര്‍ത്തകസമിതി യോഗത്തില്‍ അറിയിച്ചു. പുതിയ പ്രസിഡന്റിനെ തെരഞ്ഞെടുക്കാനുള്ള നടപടികള്‍ ആരംഭിക്കാനും സോണിയ യോഗത്തില്‍ ആവശ്യപ്പെട്ടു. സോണിയ അധ്യക്ഷസ്ഥാനത്ത് തുടരണമെന്ന് മന്‍മോഹന്‍ സിങ്ങും എ.കെ. ആന്റണിയും ആവശ്യപ്പെട്ടു.